بلوچستان کے ضلع مستونگ کی سب تحصیل کھڈکوچہ میں کراچی جانے والی مسافر بس پر جان لیوا فائرنگ کے واقع کے بعد انتظامیہ نے علاقے میں غیر معینہ مدت کے لیے کرفیو نافذ کر دیا ہے۔
بس پر فائرنگ کے نتیجے میں 3 افراد جاں بحق اور 5 زخمی ہوگئے تھے، بلوچستان حکومت نے امن و امان کی صورتحال کے پیش نظر گزشتہ شب 9 بجے سے تا حکم ثانی کرفیو نافذ کردیا ہے۔
محکمہ داخلہ بلوچستان کے معاون بابر یوسفزئی کے مطابق کرفیو کا اطلاق رات 9 بجے سے ہوگا اور یہ اگلے احکامات تک نافذ العمل رہے گا۔
یہ بھی پڑھیں: مستونگ سے لاپتا ڈی ایس پی نوشکی، یوسف ریکی کی لاش برآمد
کرفیو کے دوران شہریوں کو گھروں سے باہر نکلنے کی اجازت نہیں ہوگی۔
انہوں نے عوام سے اپیل کی کہ وہ امن و امان کی موجودہ صورتحال کے پیش نظر انتظامیہ کی جانب سے جاری کردہ احکامات پر مکمل عمل کریں۔
’۔۔۔غیر ضروری نقل و حرکت سے گریز کریں اور قانون نافذ کرنے والے اداروں سے بھرپور تعاون کریں۔‘
مزید پڑھیں: گوگل میپ کی مبینہ غلط رہنمائی، کراچی کا خاندان مستونگ میں حملے کا شکار
بابر یوسفزئی نے خبردار کیا کہ کرفیو کی خلاف ورزی کرنے والوں کے خلاف قانون کے مطابق سخت کارروائی عمل میں لائی جائے گی۔
انہوں نے مزید کہا کہ امن و امان برقرار رکھنے کے لیے تمام ضروری اقدامات کیے جا رہے ہیں اور محکمہ داخلہ نے یہ فیصلہ عوام کے جان و مال کے تحفظ اور علاقے میں صورتحال کو قابو میں رکھنے کے لیے کیا ہے۔
