سوشل میڈیا ویب سائٹ فیس بک، واٹس ایپ اور انسٹاگرام کی مرکزی کمپنی میٹا نے شارٹ ویڈیوز بنانے والے صارفین کے لیے فیس بک اور انسٹاگرام ریلز میں کچھ نئی تبدیلیاں کرتے ہوئے ریلز کو اپڈیٹ کرنے کے لیے ایڈٹنگ اور نئے ٹیمپلیٹس متعارف کرائے ہیں۔
میڈیا رپورٹس کے مطابق میٹا کی جانب سے فیس بک ریلز ایڈٹنگ کے فیچر میں کچھ نئے ٹولز متعارف کرائے گئے ہیں، ساتھ ہی ٹک ٹاک کی طرز پر نئی ٹیمپلیٹس دی گئی ہیں تاکہ صارفین با آسانی ویڈیو ایڈٹنگ کر سکیں۔ میٹا نے شارٹ ویڈیوز کی مقبولیت کے باعث ڈیش بورڈ میں تبدیلیاں کی ہیں۔
میٹا کی جانب سے کی گئی تبدیلیوں میں ہیش ٹیگ، ٹاپ ٹرینڈز، مقبول ریلز اور دیگر فیچرز شامل ہیں جبکہ کہا جا رہا ہے کہ میٹا نے ٹک ٹاک کے نقش قدم پر چلتے ہوئے ان فیچرز کو آزمایا ہے۔
میٹا کی جانب سے ریلز میں ایڈٹنگ کے فیچر میں ٹیکسٹ، آڈیو اور میوزک وغیرہ کو شامل کرنے کے آپشن کو بہتر بنایا گیا ہے جو سب ایک ہی ایڈیٹنگ ونڈو میں ظاہر ہوں گے۔ اس سے ایڈیٹنگ کو تیز اور آسان بنایا جاسکتا ہے۔
اس کے علاوہ پروفیشنل اکاؤنٹس رکھنے والوں کو فیس بک پر مزید فعال ہونے کے لیے روزانہ کی چیک لسٹ اور دیگر سہولیات دی جا رہی ہیں تاکہ فعال رہ کر فالورز کی تعداد مزید بڑھائی جا سکے۔
رپورٹ کے مطابق نیوز فیڈز میں ظاہر ہونے والا ایک اور دلچسپ فیچر’کری ایٹرز ٹو فالو‘ کے تحت نئے ابھرتے ہوئے تخلیق کاروں کو فائدہ مل سکتا ہے، اس فیچرکے تحت پروفیشنل موڈ ’تخلیق کاروں‘ کو فالو بٹن بھی فراہم کیا گیا ہے۔
میٹا نے باضابطہ طور پر اعلان کیا ہے کہ ان فیچرز کی مقبولیت کے بعد وہ اگلے چند ہفتوں میں پروفیشنل صارفین کے لیے مزید سہولیات بھی پیش کرے گا۔
