وزیر داخلہ بلوچستان میر ضیااللہ لانگو نے کہا ہے کہ ریاست مخالف بیانیے اور دہشتگردوں کی حمایت پر مقدمات اور گرفتاریاں ضرور ہوں گی۔
میڈیا سے گفتگو کرتے ہوئے وزیر داخلہ بلوچستان میر ضیاء اللہ لانگو نے کہا کہ ڈاکٹر عائشہ فیض کے خلاف ریاست مخالف بیانیے پر سی ٹی ڈی نے مقدمہ درج کیا ہے۔
انہوں نے کہاکہ ڈاکٹر عائشہ کی گرفتاری اور ان کے خلاف مقدمہ درج کرنا قانون کے مطابق ہوا ہے۔
میر ضیااللہ لانگو کا کہنا تھا کہ ریاست پاکستان کے خلاف اور دہشتگردی کی حمایت کرنے والوں کے خلاف قانون اپنا راستہ اختیار کرے گا۔
انہوں نے کہاکہ میرے خلاف روزانہ 50 افراد بات کرتے ہیں، کسی کو گرفتار نہیں کیا جاتا۔
وزیر داخلہ بلوچستان نے کہاکہ ڈاکٹر عائشہ فیض کے خلاف پاکستان ریاست مخالف بیانیے اور دہشتگردوں کی حمایت پر مقدمہ درج کیا گیا ہے۔
انہوں نے واضح کیاکہ جو بھی پاکستانی شہری ملک و ریاست توڑنے کی بات کرے گا، اس کے خلاف مقدمہ بھی درج ہوگا اور گرفتاری بھی ہوگی۔
میر ضیااللہ لانگو نے کہاکہ ہر پاکستانی شہری کو سیاستدانوں اور میرے خلاف پریس کانفرنس کرنے کا حق حاصل ہے۔
انہوں نے کہاکہ پاکستان توڑنے، سیکیورٹی فورسز، شہریوں اور سرکاری املاک کو نقصان پہنچانے والوں کو حکومت نے دہشت گرد قرار دیا ہے۔
صوبائی وزیر داخلہ کا کہنا تھا کہ دہشتگرد قرار دیے گئے عناصر کے حق میں بات اور ملک توڑنے والوں کے حق میں پریس کانفرنس کی جائے گی تو قانون حرکت میں آئےگا۔
