گورنر پنجاب سردار سلیم حیدر خان نے لاہور میں منعقدہ کھجور فیسٹیول میں شرکت کی اور پاکستان میں کاشت ہونے والی مختلف اقسام کی کھجوروں کے اسٹالز کا دورہ کیا۔
فیسٹیول میں آمد پر کسانوں نے گورنر پنجاب کا ڈھول کی تھاپ پر استقبال کیا، جبکہ اوورسیز پاکستانیوں سمیت شہریوں نے بھی شرکت کی۔
اس موقع پر گفتگو کرتے ہوئے گورنر پنجاب نے کہا کہ وہ خود زمیندار ہیں اور کاشتکاروں کے مسائل سے بخوبی آگاہ ہیں۔ پیپلز پارٹی کسانوں اور کاشتکاروں کی ہر سطح پر حوصلہ افزائی کرتی ہے اور حکومت کو بھی ان کی بھرپور سرپرستی کرنی چاہیے۔
سردار سلیم حیدر خان نے کہا کہ پاکستان کھجور پیدا کرنے والا بہترین ملک ہے جہاں مختلف اقسام کی اعلیٰ معیار کی کھجوریں پیدا ہوتی ہیں۔ مقامی کھجور کی پیداوار میں حکومت کی معمولی توجہ سے بھی نمایاں بہتری لائی جاسکتی ہے۔
گورنر پنجاب کی لاہور کھجور فیسٹیول میں شرکت
گورنر پنجاب نے کہا کہ وہ خود زمیندار ہیں اور کاشتکاروں کے مسائل سے بخوبی آگاہ ہیں۔ پیپلز پارٹی کسانوں اور کاشتکاروں کی ہر سطح پر حوصلہ افزائی کرتی ہے اور حکومت کو بھی ان کی بھرپور سرپرستی کرنی چاہیے۔@KulAalam #Dates pic.twitter.com/hM1N052kuY— Media Talk (@mediatalk922) September 7, 2026
انہوں نے کہا کہ پاکستانی کھجور عالمی معیار کی ہے، تاہم اس کی برآمدات بڑھانے کے لیے معیاری اور بہترین پیکیجنگ پر توجہ دینا ہوگی۔ کھجور کی برآمدات میں اضافے سے سرمایہ کاری اور ملکی آمدن میں بھی اضافہ کیا جاسکتا ہے۔
گورنر پنجاب کا کہنا تھا کہ بیرونِ ملک مقیم پاکستانیوں کو پاکستانی مصنوعات کو ترجیح دینی چاہیے۔ حکومت یا کسی اور کی طرف دیکھنے کے بجائے ملک کی بہتری کے لیے ہر شخص کو اپنی استطاعت کے مطابق کردار ادا کرنا چاہیے۔
مزید پڑھیں:کیا سابق وزیراعلیٰ پنجاب چوہدری پرویز الٰہی کو گورنر پنجاب بنایا جارہا ہے؟
انہوں نے کہا کہ ہمیں سیاست سے بالاتر ہوکر کاشتکاروں کا ساتھ دینا ہوگا، کیونکہ کسان ہمیشہ مشکل وقت میں حکومت کا ساتھ دیتے ہیں۔ ایسے فیسٹیولز کے انعقاد سے نہ صرف کاشتکاروں کی حوصلہ افزائی ہوتی ہے بلکہ مقامی زرعی مصنوعات کو فروغ دینے کے مواقع بھی پیدا ہوتے ہیں۔
