سرکاری حج اسکیم میں حج واجبات کی دوسری قسط کی وصولی جاری ہے، اب تک 32 ہزار 178 سرکاری عازمین حج نے دوسری قسط کی ادائیگی مکمل کرلی ہے۔
ترجمان وزارت مذہبی امور کے مطابق ون لنک کے ذریعے 17 ہزار عازمین حج نے گھر بیٹھے دوسری قسط کی ادائیگی مکمل کی، جبکہ 14 سو افراد نے بینک کارڈ اور 13 ہزار 8 سو افراد نے مینول بینک چالان کو ترجیح دی۔
ترجمان کے مطابق ڈیجیٹل حج پورٹل کے ذریعے گھر بیٹھے آن لائن ادائیگی کا تناسب 57 فیصد سے بڑھ گیا ہے، جبکہ حج واجبات کی دوسری قسط کی مد میں 20.5 ارب روپے موصول ہو گئے ہیں۔
سرکاری حج اسکیم میں حج واجبات کی دوسری قسط کی ادائیگی کی حتمی تاریخ 20 اکتوبر مقرر ہے۔ واجبات کی ادائیگی نیشنل آئی ٹی بورڈ کے حج پورٹل پر ون لنک، کارڈ یا مینول بینک چالان سے مکمل ہو گی۔
ترجمان مذہبی امور کے مطابق سرکاری حج اسکیم میں ایک لاکھ 3 ہزار عازمین حج نے میڈیکل فٹنس سرٹیفیکیٹ ایپ پر اپ لوڈ کر دیے ہیں، جبکہ رہ جانے والے عازمین حج کو حج پورٹل پر موجود میڈیکل فٹنس فارم کو ڈاکٹر سے تصدیق کرانا لازم ہے۔
دوسری جانب پاک حج ایپ کے ذریعے پرائیویٹ حج اسکیم میں بکنگ جاری ہے۔ 33 ہزار 171 عازمین حج نے پرائیویٹ اسکیم میں واجبات جمع کروا دیے ہیں، جبکہ پرائیویٹ حج اسکیم میں 38 ہزار 500 نشستیں تاحال دستیاب ہیں۔
ترجمان مذہبی امور نے کہاکہ پرائیویٹ حج اسکیم میں بکنگ اور ادائیگی کے لیے صرف پاک حج ایپ یا حج پورٹل استعمال کریں۔
