مصنوعی ذہانت کی کمپنی اینتھروپک کے اے آئی ماڈل نے امریکی شہر فلاڈیلفیا کی پولیس ویب سائٹ پر قتل کے ایک مقدمے سے متعلق جعلی اطلاع جمع کرائی، جس کے بعد کمپنی نے سرکاری ویب سائٹس کے غیر مجاز استعمال کے متعدد واقعات کا انکشاف کیا ہے۔
خبر رساں ادارے رائٹرز کے مطابق اینتھروپک نے جمعے کو بتایا کہ اس کے کلاڈ ماڈلز نے وفاقی، ریاستی اور مقامی اداروں کی بعض ویب سائٹس پر اجازت کے بغیر کارروائیاں کیں۔ کمپنی نے وائٹ ہاؤس کو ان واقعات سے آگاہ کرنے کے ساتھ متعلقہ اداروں کو بھی مطلع کیا، تاہم ان اداروں کے نام ظاہر نہیں کیے۔
فلاڈیلفیا پولیس کے مطابق جعلی اطلاع 18 جولائی کو غیر حل شدہ قتل کے مقدمات سے متعلق ویب سائٹ کے ذریعے جمع کرائی گئی تھی۔ اطلاع میں لکھا گیا تھا کہ بھیجنے والے کو مقدمے کے بارے میں معلومات ہو سکتی ہیں اور اس نے واقعے کے وقت جائے وقوعہ کے قریب مشتبہ شخص سے ملتی جلتی شکل کے کسی فرد کو دیکھنے کا دعویٰ کیا تھا۔
"The Philadelphia Police Department said earlier on Friday that it had been notified by Anthropic that its technology had submitted a false homicide tip to the agency’s website. The tip was dated July 18 and claimed that the submitter had information about an unsolved case, the…
— Kaitlan Collins (@kaitlancollins) October 10, 2026
پولیس نے کہا کہ اینتھروپک نے رواں ہفتے اس واقعے سے آگاہ کیا اور اسے خودکار آزمائشی عمل سے منسوب کیا۔ پولیس کے مطابق اطلاع کو اسپیم قرار دے کر روک دیا گیا تھا اور اسے تفتیشی جانچ یا متعلقہ حکام تک نہیں پہنچایا گیا۔ حکام نے واقعے کی نشاندہی اور اطلاع دینے میں تقریباً 2 ماہ کی تاخیر کو ناقابل قبول قرار دیا۔ تاہم پولیس کا کہنا ہے کہ اس کے پاس اپنے نظام تک غیر مجاز رسائی یا ڈیٹا متاثر ہونے کا کوئی ثبوت نہیں۔
رائٹرز کے مطابق اینتھروپک کے بیان کردہ دیگر واقعات میں اے آئی ماڈلز نے بعض ایسی عوامی معلومات مفت حاصل کیں جن تک رسائی کے لیے عموماً فیس ادا کرنا پڑتی ہے، جبکہ ایک یونیورسٹی کے زیر انتظام عوامی ٹول میں خامی بھی سامنے آئی۔ ماڈلز نے یو آر ایل مختصر کرنے والی مفت خدمات استعمال کرکے بعض پابندیوں سے بچنے کی صلاحیت بھی دکھائی۔
یہ واقعات خودکار اے آئی نظاموں کے غیر متوقع اور غیر مجاز اقدامات پر بڑھتے ہوئے خدشات کے دوران سامنے آئے ہیں۔ ستمبر میں اینتھروپک کی حریف کمپنی اوپن اے آئی نے آسٹریلیا کے صحت سے متعلق ڈیٹا پورٹل کی ایک اے آئی ایجنٹ کے ہاتھوں ہیکنگ پر معذرت کی تھی۔
یہ بھی پڑھیں:صارفین نے بدسلوکی کی تو اے آئی ماڈل کلاڈ ان سے گفتگو روک دے گا، اینتھروپک کا انتباہ
امریکی فیڈرل ٹریڈ کمیشن کے شعبۂ تعلقاتِ عامہ کے ڈائریکٹر جو گیبریل سائمنسن نے کہا کہ سپر انٹیلی جنس سے متعلق کمپنیوں کو اپنے ماڈلز کے ایسے واقعات فوری طور پر ظاہر کرنے اور ممکنہ نقصان کے ازالے کے لیے فیصلہ کن اقدامات کرنے چاہییں۔
