اسلام آباد کے ایف نائن پارک (فاطمہ جناح پارک) میں ممکنہ تعمیرات اور درختوں کی کٹائی سے متعلق خدشات نے شہریوں کی توجہ حاصل کرلی۔ پاکستان کے پہلے تھیم پارک کے لیے سعودی سرمایہ کاروں کے ساتھ معاہدے کے بعد سوشل میڈیا صارفین نے پارک کے قدرتی ماحول اور سبزے کے تحفظ کا مطالبہ کیا ہے۔
اسلام آباد میں پاکستان کا پہلا تھیم پارک بنانے کے منصوبے کے اعلان کے بعد اس پارک کے مستقبل سے متعلق مختلف سوالات سامنے آنے لگے ہیں۔ سوشل میڈیا صارفین نے خدشہ ظاہر کیا ہے کہ کہیں تفریحی سہولیات کی فراہمی اور ترقیاتی منصوبوں کے نام پر پارک کے درختوں کو نقصان تو نہیں پہنچایا جائے گا۔
یہ بھی پڑھیں: ایف 9 پارک میں درختوں کی کٹائی پرسپریم کورٹ کا ازخود نوٹس
یہ بحث اس وقت سامنے آئی جب اسلام آباد میں پاکستان کا پہلا تھیم پارک قائم کرنے کے لیے سعودی سرمایہ کاروں کے ساتھ مفاہمتی یادداشت پر دستخط کیے گئے اور محسن نقوی نے کہا کہ وہ ’جنگل نما‘ ایف نائن پارک کو بدلنے جا رہے ہیں۔ ایف نائن پارک کے اندر 400 ایکڑ اراضی ابھی بھی ہے جو کہیں استعمال نہیں ہو رہی۔
ایف نائن پارک میں ممکنہ تعمیرات کے حوالے سے ماحولیاتی کارکن اور اسکول ٹیچر عثمان نے بھی سوشل میڈیا پر ایک ویڈیو شیئر کی جس میں انہوں نے حکام سے اپیل کی کہ پارک کو محض ترقیاتی سرگرمیوں کے لیے اس کی قدرتی خوبصورتی سے محروم نہ کیا جائے۔
View this post on Instagram
عثمان کے مطابق پارک میں بارش کا پانی زمین میں جذب ہوکر زیرِ زمین پانی کے ذخائر کو تقویت دینے میں اہم کردار ادا کرتا ہے۔ ان کا کہنا تھا کہ قدرتی سبزہ نہ صرف فضائی آلودگی کم کرنے میں مدد دیتا ہے بلکہ شہر کے ماحولیاتی توازن کو برقرار رکھنے کے لیے بھی ضروری ہے۔ انہوں نے حکام پر زور دیا کہ پارک میں بڑی عمارتیں اور بلند و بالا تعمیرات کرنے کے بجائے مزید درخت اور پودے لگائے جائیں تاکہ اسلام آباد کے سبز ماحول کو محفوظ بنایا جا سکے۔
سوشل میڈیا صارفین نے بھی اس مؤقف کی حمایت کرتے ہوئے کہا کہ جدید تفریحی سہولیات کی فراہمی اپنی جگہ اہم ہے تاہم ان کی تعمیر کے دوران موجودہ درختوں، قدرتی ماحول اور پارک کی اصل شناخت کو برقرار رکھنا بھی ضروری ہے۔
شہریوں کے خدشات اور سوشل میڈیا پر ہونے والی بحث کے بعد وفاقی وزیر داخلہ محسن نقوی نے وضاحت کرتے ہوئے یقین دہانی کرائی کہ ایف نائن پارک کی بہتری کے دوران ایک بھی درخت نہیں کاٹا جائے گا اور نہ ہی وہاں نئی کنکریٹ تعمیرات کی جائیں گی۔
F-9 Park holds a special place in the hearts of everyone living in Islamabad.
Let me make it absolutely clear that Not a single tree will be cut 100% guaranteed. No new concrete structures.
Instead, we are planning better lighting, a beautiful lake, coffee shops, improved…
— Mohsin Naqvi (@MohsinnaqviC42) October 25, 2026
سماجی رابطے کی ویب سائٹ ایکس پر اپنے پیغام میں محسن نقوی نے کہا کہ ایف نائن پارک اسلام آباد کے رہائشیوں کے دلوں میں خصوصی مقام رکھتا ہے۔ ان کے مطابق پارک میں بہتر روشنی، خوبصورت جھیل، کافی شاپس، جدید واک ویز اور ہزاروں اضافی درخت لگانے کی منصوبہ بندی کی جا رہی ہے۔
انہوں نے واضح کیا کہ حکومت کا مقصد پارک کو خاندانوں اور دیگر شہریوں کے لیے زیادہ سرسبز، محفوظ، خوبصورت اور پُرکشش بنانا ہے۔
