پاکستان اور امریکا نے توانائی کے شعبے میں دوطرفہ تعاون کو مزید فروغ دینے پر اتفاق کیا ہے، جبکہ دونوں ممالک کے درمیان طویل مدتی توانائی فراہمی کے معاہدوں، امریکی سرمایہ کاری اور توانائی کے نئے منصوبوں سے متعلق امور پر بھی تبادلہ خیال کیا گیا۔
اسلام آباد میں وفاقی وزیر پیٹرولیم علی پرویز ملک سے امریکی ناظم الامور نیٹلی اے بیکر نے ملاقات کی، جس میں مشرق وسطیٰ کی موجودہ صورتحال کے تناظر میں پاکستان کی توانائی سلامتی اور ایندھن کی بلاتعطل فراہمی یقینی بنانے کے لیے کیے جانے والے اقدامات پر تفصیلی گفتگو ہوئی۔
ملاقات کے دوران امریکی ناظم الامور نیٹلی اے بیکر نے کہا کہ امریکا پاکستان کی توانائی ضروریات پوری کرنے کے لیے قریبی تعاون کا خواہاں ہے۔
انہوں نے پاکستان میں امریکی کمپنیوں کے لیے کاروباری مواقع پیدا کرنے کی ضرورت پر زور دیتے ہوئے کہا کہ دونوں ممالک کے درمیان توانائی کی طویل مدتی فراہمی کے معاہدے باہمی طور پر فائدہ مند ثابت ہو سکتے ہیں۔
اس موقع پر پاکستان اسٹیٹ آئل اور پاکستان ایل این جی لمیٹڈ کے منیجنگ ڈائریکٹرز نے امریکی کمپنیوں کی جانب سے پاکستان کو مائع قدرتی گیس کی فراہمی میں دلچسپی سے متعلق اجلاس کو بریفنگ دی۔
وفاقی وزیر پیٹرولیم علی پرویز ملک نے امریکی ناظم الامور کو ملک کی توانائی ضروریات کے تحفظ اور ایندھن کی مسلسل فراہمی یقینی بنانے کے لیے حکومتی اقدامات سے آگاہ کیا۔
امریکی ناظم الامور نیٹلی اے بیکر نے ایندھن کی فراہمی سے متعلق صورتحال کو مؤثر انداز میں سنبھالنے پر پاکستان کی کوششوں کو سراہا۔
علی پرویز ملک نے کہا کہ پاکستان اپنی توانائی ضروریات کے تحفظ کے لیے پُرعزم ہے اور پاکستان و امریکا کی متعلقہ ٹیمیں توانائی کے شعبے میں تعاون کے نئے مواقع تلاش کر رہی ہیں۔
انہوں نے کہا کہ پاکستان کی ریفائنریوں کی اپ گریڈیشن کے منصوبے امریکی مالیاتی اداروں کے لیے سرمایہ کاری کے اہم مواقع فراہم کر سکتے ہیں۔
وفاقی وزیر پیٹرولیم نے امریکی کمپنیوں کو پاکستان منرلز انویسٹمنٹ فورم میں شرکت کی دعوت دیتے ہوئے کہا کہ پاکستان کے معدنیاتی شعبے میں سرمایہ کاری کے وسیع مواقع موجود ہیں، جن سے امریکی کمپنیاں فائدہ اٹھا سکتی ہیں۔
علی پرویز ملک کا کہنا تھا کہ امریکی تعاون اور دوطرفہ روابط میں اضافہ پاکستان کی طویل مدتی توانائی سلامتی کو مزید مضبوط بنانے میں معاون ثابت ہوگا۔
وفاقی وزیر پیٹرولیم نے توانائی کے شعبے میں امریکی تعاون پر شکریہ بھی ادا کیا۔
