بالی وُوڈ اداکارہ ودیا بالن نے فلم ’ نیت ‘ کے سیٹ پر مہمان کے ساتھ پرینک کیا اور مہمان کو یہ دکھانے کی پوری کوشش کی کہ وہ انگریزی نہیں بول سکتیں۔
ودیا بالن کے ساتھ فلم ’نیت ‘ میں کام کرنے والی اداکارہ شاہانہ گوسوامی نے انکشاف کیا ہے کہ ’ایک بار میرے ایک دوست نے ’ نیت ‘ کے سیٹ کا دورہ کیا۔ ودیا بالن نے مجھ سے کہا کہ وہ اسے یہ یقین دلانے کے لیے پرینک کریں گی کہ انہیں انگریزی بالکل نہیں آتی۔ ‘
’انہوں نے مہمان کے ساتھ گفتگو شروع کی جبکہ مہمان انگریزی زبان میں بات کرتے رہے جب کہ ودیا ہندی میں بات کرتی رہیں۔ یہ سلسلہ کچھ دیر تک جاری رہا لیکن ہمیں ویسا ردعمل نہیں ملا جس کی ہمیں توقع تھی۔ جب ودیا نے محسوس کیا کہ وہ اب اکیلے ہندی میں بات جاری نہیں رکھ سکتیں تو انہوں نے اعتراف کرلیا کہ وہ انگریزی جانتی ہیں۔‘
’میرے دوست نے پھر اسے ہندی میں بتایا کہ وہ یہ سب جانتے ہیں کہ وہ انگریزی جانتی ہیں اور میرے ساتھ محض مذاق کر رہی ہیں۔ ‘
اداکارہ شاہانہ گوسوامی نے مزید کہا کہ ’نیت‘ کے سیٹ پر ماحول پرلطف تھا اور ودیا وہ پہلی فرد تھیں جنہوں نے پرینک کیا۔ شاہانہ گوسوانی نے سکاٹ لینڈ میں ہونے والی شوٹنگ کو بھی یاد کیا اور بتایا کہ وہاں ان کے کپڑے سردی کو شکست دینے میں ناکام ثابت ہورہے تھے۔ جب وہ شوٹنگ نہیں کرتی تھیں تو اکثر خود کو کمبل میں لپیٹے رکھتی تھیں۔
ودیا بالن کی حالیہ فلمیں
ودیا بالن نے فلمی دنیا میں گزشتہ چند سالوں سے کوئی نئی فلم نہیں دی، ان کی آخری 3فلموں میں شکنتلا دیوی، شیرنی شامل ہیں، تاہم اب ’نیت‘ کے علاوہ ودیا بالن رومانوی کامیڈی فلم ’لورز‘ میں بھی نظر آئیں گی جو جلد ہی ریلیز ہونے والی ہے۔
وہ ’لورز‘ میں پرتک گاندھی کے ساتھ نظر آئیں گی، شرشا گوہا ٹھاکرتا کی ہدایت کاری میں بننے والی اس فلم میں الیانا ڈی کروز اور سیندھل راما مورتی بھی ہیں۔
’نیت‘ میں ودیا بالن کا کردار
انو مینون کی سسپنس سے بھرپور فلم ’نیت‘ ایک جاسوس (ودیا) کی کہانی ہے جو ایک ارب پتی کی پارٹی میں قتل کی تحقیقات کے لیے پہنچتی ہے، ودیا بالن، میرا راؤ کے نام سے کہانی میں داخل ہوتی ہیں اور ایک پراسرار قتل کا معمہ حل کرنے کے لیے کوشش کرتی ہیں، ’نیت‘ 7 جولائی کو سینما گھروں کی زینت بنے گی۔
واضح رہے کہ گزشتہ دنوں’نیت‘ کا سنسنی خیز ٹریلر جاری کردیا گیا تھا۔ فلم میں ودیا بالن کے ساتھ راہل بوسے، پراجکتا کولی، شبانہ گوسوامی، امریتا پوری، نیرج کابی، دیپانتا شرما، اشیکا مہرا، نکی ویلیا اور دیگر شامل ہیں۔
