پاکستان کرکٹ ٹیم کے کپتان بابر اعظم نے کہا ہے کہ ذکاء اشرف کے پچھلے دور میں پاکستان نے ایشیا کپ جیتا تھا، انشاء اللہ اس بار بھی ایشیا کپ جیت کر پاکستان لائیں گے۔
پاکستان کرکٹ ٹیم کی سری لنکا روانگی سے قبل چئیرمین مینجمنٹ کمیٹی ذکاء اشرف نے کپتان بابر اعظم کو ٹیلی فون کیا جس میں انہوں نے قومی ٹیم کے لیے نیک خواہشات کا اظہار کیا۔ کپتان نے انہیں چیئرمین مینجمنٹ کمیٹی کا عہدہ سنبھالنے پر مبارک باد دی۔
ذکاء اشرف نے کپتان بابر اعظم سے کہا کہ وہ پوری ٹیم کو ان کی طرف سے نیک خواہشات کا پیغام دیں۔ انہوں نے توقع ظاہر کی کہ ٹیم دورہ سری لنکا اور ایشیا کپ میں پاکستان کے لیے کامیابیاں سمیٹے گی۔
ٹیلی فونک گفتگو میں چئیرمین ذکاء اشرف نے ایشیا کپ سے متعلق بھی کپتان بابر اعظم سے گفتگو کی۔ کپتان نے کہا’ آپ کے پچھلے دور میں بھی پاکستان نے ایشیا کپ جیتا تھا، انشاء اللہ اس بار بھی ایشیا کپ جیت کر پاکستان لائیں گے۔
انہوں نے کہا کہ وہ پاکستان ٹیم کو مزید اوپر لے جانے کے لیے کوئی کسر نہیں چھوڑیں گے۔ اور پاکستان کی خاطر بھرپور توانائی کے ساتھ میدان میں اتریں گے۔
