بھارتی فلم انڈسٹری ’بالی وڈ‘ کے انتہائی کامیاب ہدایتکار راج کمار ہیرانی اور انڈسٹری میں راج کرنے والے معروف اداکار شاہ رخ خان کی نئی آنے والی فلم ’ڈنکی‘ نے سینما گھروں کی زینت بننے سے قبل ہی ریکارڈ بنانے شروع کر دیے ہیں۔
فلم ڈنکی میں شاہ رخ خان کا مرکزی کردار ہو گا اور اس کا شمار ان فلموں میں کیا جا رہا ہے جو رواں برس کی سب سے زیادہ انتظار کی جانے والی موویز میں سے ہے۔
فلم ’ڈنکی‘ 22 دسمبر 2023 کو سینما گھروں کی زینت بنے گی۔ بھارتی میڈیا رپورٹس کے مطابق راج کمار ہیرانی اور شاہ رخ خان کی جانب سے ایک اوور دی ٹاپ ’او ٹی ٹی‘ کمپنی کے ساتھ اب تک کی سب بڑی ڈیجیٹل ڈیل کی جا چکی ہے۔
یہ خبریں بھی میڈیا میں گردش کر رہی ہیں کہ فلم ’ڈنکی‘ کے ڈیجیٹل حقوق 155 کروڑ (بھارتی روپے) میں فروخت ہوئے ہیں اور یہ ہندوستانی سینما کی تاریخ کا سب سے بڑا سودا ظاہر کیا جا رہا ہے۔
واضح رہے کہ بالی وڈ کے اداکار شاہ رخ خان کی ایک اور فلم ’جوان‘ رواں برس ستمبر میں ریلیز ہونے جا رہی ہے۔ اس فلم کے ڈیجیٹل حقوق 120 کروڑ روپے میں نیٹ فلیکس نے حاصل کر لیے ہیں۔
ریلیز سے قبل ہی لوگوں کے ذہنوں پر چھا جانے والی فلم ’ڈنکی‘ ملک سے باہر جانے کے لیے غیر قانونی طریقے اختیار کرنے کے موضوع پر بنائی گئی ہے۔ اس فلم میں تاپسی پنو اور وکی کوشل نے بھی اہم کردار ادا کیا ہے۔
