سپریم کورٹ: پی ٹی آئی پر پابندی کی عون چوہدری کی درخواست اعتراضات لگا کر واپس

سپریم کورٹ آف پاکستان کے رجسٹرار آفس نے پاکستان تحریک انصاف (پی ٹی آئی) پر پابندی کے لیے عون چوہدری کی دائر درخواست کواعتراضات لگا کر واپس کر دیا ہے۔

سپریم کورٹ کے رجسٹرار آفس نے اعتراض عائد کیا ہے کہ استحکام پاکستان پارٹی کے رہنما عون چوہدری کی درخواست میں آرٹیکل 184/3 کے تقاضے پورے نہیں کیے گئے۔

سپریم کورٹ نے اعتراض عائد کیا ہے کہ عون چوہدری کی درخواست میں واضح نہیں ہے کہ جماعت پر پابندی 184/3 کے زمرے میں کیسے آتی ہے۔

سپریم کورٹ آف پاکستان کے رجسٹرار آفس نے یہ بھی اعتراض عائد کیا ہے کہ عون چوہدری کی درخواست میں واضح نہیں کہ پی ٹی آئی پر پابندی مفادِ عامہ کا معاملہ کیسے ہے۔

عون چوہدری کی درخواست پر اعتراض عائد کیا گیا ہے کہ عون چوہدری نے متعلقہ فورم سے رجوع نہیں کیا ہے، اس معاملے پر آرٹیکل 248 کے تحت وزیرِ اعظم اور وزیر دفاع کو فریق نہیں بنایا جا سکتا ہے۔

واضح رہے کہ پاکستان تحریک انصاف (پی ٹی آئی) پر پابندی کے لیے استحکام پاکستان پارٹی کے رہنما عون چوہدری نے سپریم کورٹ سے رجوع کر رکھا ہے۔