کل لاہور ہائیکورٹ میں پرویزالہٰی کو جیل کے اندر سہولیات نہ ملنے کے حوالے سے کیس کی سماعت میں پرویز الہٰی نے عدالت کو بتایا کہ ڈيڑھ ماہ سے جیل میں ہوں، جج نے پوچھا وہاں کیا مسائل ہیں؟ پرویزالہٰی نے جواب دیا کہ وہاں مسائل کے سوا کچھ بھی نہیں، ہر طرف کیڑے ہیں، کمرے میں ہی واش روم ہے، اے سی نہیں ہے۔ چیزیں تصویریں بنوانے کے لیے لاتے ہیں اور پھر اتار لی جاتی ہیں۔ اس کیس پر آج بھی سماعت جاری ہے۔لیکن کل کی سماعت کا احوال بتانا اسلیے ضروری تھا کیونکہ یہ تمام سہولیات چوہدری شجاعت حسین کہ کہنے پر پرویز الہٰی کو بی کلاس میں دی گئی تھیں لیکن اب تک چوہدری صاحب شکایت کر رہے ہیں سہولیات نہیں مل رہیں۔
خاندانی ذرائع کے مطابق چوہدری شجاعت کی پرویز الہٰی کے ساتھ 4 ملاقاتیں جیل میں ہو چکی ہیں اور ہر ملاقات میں چوہدری شجاعت کا ایک سوال پرویز الہٰی سے ضرور ہوتا ہے ڈھیٹ ہو گئے ہو تو پرویز الہٰی مسکرا کر کہہ دیتے ہیں یہ دن بھی گزر جائیں گے ۔
خاندانی ذرائع کے مطابق پرویز الہٰی نہ ہی پریس کانفرنس کے لیے مان رہے ہیں اور نہ ہی مونس الہٰی، والد کو چُھڑوانے کے لیے پریس کانفرنس کرنے کو تیار ہیں۔ مونس الہٰی کی والدہ بھی مونس الہٰی کے مؤقف کو سپورٹ کرتی ہیں۔
عید الاضحیٰ پر چوہدری شجاعت سمیت تینوں بھائی گجرات نہیں گئے
چوہدری پرویز الہٰی چونکہ جیل میں ہیں تو اس دفعہ چوہدری شجاعت سمیت تینوں بھائی گجرات نہیں گئے اور یہ پہلی مرتبہ ہوا کہ چوہدری برادران کی فیملز نے عید لاہور میں منائی ہے۔ خاندانی ذرائع کے مطابق بڑی عید پر چوہدری شجاعت حسین، چوہدری وجاہت حیسن، چوہدری شفاعت حسین اور چوہدری شجاعت حیسن کے بیٹے سالک حسین نے پرویز الہٰی سے جیل میں ملاقات کی۔
چوہدری شجاعت سمیت تینوں بھائیوں نے پرویز الہٰی کو اس بات پر قائل کرنے کی کوشش کی کہ پی ٹی آئی کو خیر آباد کہہ دیں۔ چوہدری وجاہت نے وہ حوالہ بھی دیا کہ جب وزیراعلیٰ بننے کی بات تھی تو میں نے آپ کو سپورٹ کیا تھا اب میری بات مانیں اور پی ٹی آئی کو چھوڑ دیں۔ اس پر چوہدری پرویزالہٰی نے جواب دیا کہ میرا بیٹا نہیں مانتا جس کے بعد چوہدری پرویز الہٰی نے شکوہ کرتے ہوئے کہا اگر میرے لیے کچھ کرنا ہی تو جیل میں مجھے سہولیات مکمل دلوائی جائیں
’مجھے تمہاری صحت کی فکر ہے‘ چوہدری شجاعت حیسن
عید الاضحیٰ کے کچھ دن بعد چوہدری شجاعت کی ملاقات پھر پرویزالہیٰ سے ہوئی۔ اس دفعہ ملاقات میں اکیلے چوہدری شجاعت حیسن ہی تھے تو انہوں نے پرویزالہٰی سے کہا کہ مجھے تمہاری صحت کی فکر ہے تمہاری عمر 77 سال ہوگی ہے، تمہارے پاؤں پھول گئے ہیں۔ اپنے بیٹے کو سمجھاؤ اور واپس آجاؤ۔ اس پر چوہدری پرویز الہٰی نے کہا کہ میری مونس الہٰی سے بات ہی نہیں ہوئی، اس کے فون پر گھنٹیاں جاتیں ہیں مگر اٹھا کوئی نہیں رہا۔ چوہدری شجاعت حیسن نے کہا کہ مزید دن جیل میں رہنے سے صحت مزید خراب ہوگی کوئی فیصلہ کرنا ہوگا جس پرویز الہٰی نے کہا اب بات ہوئی تو مونس سے مشورہ کروں گا۔
