ترک ڈرامے کرولس عثمان کے ہیرو کی پاکستان آمد متوقع

مشہور ترک ڈرامے کرولس عثمان کے ہیرو براک اوزجیفت نجی کمپنی کی دعوت پر پاکستان آئیں گے۔

العربیہ ڈاٹ نیٹ کے مطابق کرولس عثمان کے ہیرو براک اورزجیفت نے سوشل میڈیا پر ایک ویڈیو پیغام میں کہا ہے کہ وہ جلد پاکستان کا دورہ کریں گے اور پاکستانی مداحوں سے ملاقات کریں گے۔

انہوں نے اپنے مداحوں کو یہ اطلاع بھی دی کہ پاکستانی برانڈ نے انہیں اپنا سفیر مقرر کیا ہے۔ ادکار براک اورزجیفت کے پاکستان آنے کی خبر پر ان کے مداحوں نے خوشی کا اظہار کیا ہے اور ان میں سے ایک بڑی تعداد نے سوشل میڈیا پر اداکار کو اپنے متعلقہ شہروں  میں آنے کی دعوت بھی دی ہے۔

واضح رہے کہ ترکی کے مشہور ڈرامے کرولس عثمان کے 4 سیزنز مکمل ہوچکے ہیں اوراس ڈرامے کو بھی ارطغرل غازی کی طرح دنیا بھر میں پذیرائی حاصل ہوئی ہے۔

مقبولیت کے ریکارڈ قائم کرنے والے ترک ڈرامے ارطغرل غازی کے مرکزی کردار اداکار انجین التان دوزیتان نے بھی دسمبر 2020 میں پاکستان کا دورہ کیا تھا۔

یاد رہے کہ اپنے مختصر دورے کے موقع پر انجین التان دوزیتان کا کہنا تھا کہ وہ بخوبی واقف ہیں کہ پاکستان کے عوام ان سے بہت محبت کرتے ہیں۔ ان کا یہ بھی کہنا تھا کہ اسی وجہ سے وہ پاکستان آئے ہیں اور یہ ان کا پہلا دورہ ضرور ہے لیکن آخری نہیں۔