وزیر اعظم شہباز شریف نے کہاکہ ملک میں معاشی استحکام کے لیے آئی ایم ایف کا قرض بہت ضروری تھا، ہم نے آئی ایم ایف کی تمام شرائط مانی ہیں، اللہ کا شکر ہے کہ پاکستان ڈیفالٹ ہونے سے بچ گیا ہے۔
وزیر اعظم شہباز شریف نے بہاؤالدین زکریا یونیورسٹی میں لیپ ٹاپ تقسیم کرنے کی تقریب کے دوران کہاکہ آئی ایم ایف پروگرام منظور ہونے پر ہمیں خوشی کے شادیانے نہیں بجانے چاہیے، کیونکہ آئی ایم ایف پروگرام کوئی حلوہ یا کھیر نہیں ہے، ہمیں آئی ایم ایف کی کڑی شرائط کو ماننا پڑے گا۔
اس سے قبل وزیر اعظم شہبازشریف نے کہاکہ پاکستان تحریک انصاف (پی ٹی آئی) نے پاکستان کے 4 سال برباد کیے، ان کے پاس اربوں روپے موجود تھے لیکن اللہ نے انکو ایک بھی عوامی منصوبہ لگانے کی توفیق نہیں دی، بس ٹانگ پر ٹانگ رکھ کر لوگوں پر الزامات لگاتے رہے۔
مزید پڑھیں
وزیر اعظم شہباز شریف نے ملتان کے نشتر اسپتال 2 کا دورہ کرتے ہوئے کہاکہ 2018 میں نواز شریف نے اس منصوبے کا اعلان کیا تھاکہ لیکن گزشتہ حکومت نے اس منصوبے کو نظر انداز کرتے ہوئے روک دیا۔ اب بتایا جا رہا ہے کہ 30 ستمبر تک اسکو مکمل کر لیا جائے گا۔
وزیر اعظم نے کہاکہ حکومت جو بھی آئے عوامی مفاد کے منصوبوں کو روکنا نہیں چاہیے، تحریک انصاف کو بھی چاہیے تھاکہ اپنے دورمیں اس منصوبے کو مکمل کر لیا جاتا لیکن وہ ٹانگ پر ٹانگ رکھ کر دوسروں پر الزام لگانے میں مصروف رہے۔
شہباز شریف نے کہاکہ ملتان نشتراسپتال 2 منصوبے کے لیے مختص رقبہ بہت زیادہ ہے، انتظامیہ سے بات کی ہے کہ یہاں پر میڈیکل سٹی کے قیام کے لیے کوئی لائحہ عمل بنایا جائے۔
انکا مزید کہنا تھاکہ اگلے الیکشن میں جو بھی حکومت آئے گی وہ عوام کے مفاد کے لیے کام کرے گی، عوام بھی ایسے لوگوں کو مسترد کرے جوعوامی مفاد کو پس پشت ڈال کر دوسروں پر چور اور ڈاکو کے الزامات لگاتے ہیں۔
