پاکستان بینکنگ محتسب نے ششماہی رپورٹ جاری کرتے ہوئے کمرشل بینکوں کے خلاف درج شکایات میں خاطر خواہ کمی نہ ہونے کے باعث تمام بینکوں کی کارکردگی کو غیر تسلی بخش قرار دے دیا۔
بینکنگ محتسب نے سال 2023 کی پہلی ششماہی کے اعداد و شمار جاری کردیے جس کے مطابق 12 ہزار سے زائد شکایات کا ازالہ کرتے ہوئے صارفین کو 53 کروڑ 97 لاکھ روپے کا مالیاتی ریلیف فراہم کیا گیا۔
رپورٹ کے مطابق بینکنگ محتسب نے تقریباً 98 فیصد یعنی 11 ہزار 731 شکایات کو حل کیا، جن میں سے 2 فیصد یعنی 284 شکایات کو بینکنگ محتسب کے احکامات کے ذریعے حل کیا گیا۔
مزید پڑھیں
ترجمان بینکنگ محتسب کے مطابق کمرشل بینکوں کے خلاف درج ہونے والی شکایات کی تعداد میں کوئی واضح کمی نہیں دیکھی گئی، اس لیے بینکوں کی کارکردگی کو غیر تسلی بخش قرار دیا گیا ہے۔
صرف یکم جنوری سے لے کر 30 جون تک تقریبا 15 ہزار نئی شکایات موصول ہوئی ہیں جبکہ پرائم منسٹر پورٹل سے 4057 شکایات موصول ہوئیں۔
