وزیراعظم شہباز شریف نے آئی ایم ایف کے ساتھ معاہدے کے سلسلے میں پاکستان کی حمایت اور مدد کرنے پر سری لنکا کے صدر کا شکریہ ادا کرتے ہوئے کہا ہے کہ آپ نے پاکستان کے دوست اور خیرخواہ کا کردار ادا کیا ہے۔ پاکستان کے عوام کی طرف سے آپ کا شکریہ ادا کرتا ہوں۔
پریس انفارمیشن ڈیپارٹمنٹ (پی آئی ڈی) کے مطابق وزیراعظم شہباز شریف نے سری لنکا کے صدر رانیل وکرما سنگھے سے ٹیلی فون پر گفتگو کرتے ہوئے کہا کہ پاکستان اور سری لنکا قریبی اور با اعتماد دوست ہیں، علاقائی ترقی اور امن کے لیے سری لنکا کے کردار کو خراج تحسین پیش کرتے ہیں، امید ہے کہ پاکستان اور سری لنکا موجودہ معاشی مشکلات کے بھنور سے جلد نکل آئیں گے۔
واضح رہے کہ وزیراعظم شہبازشریف کی ایم ڈی آئی ایم ایف کرسٹلینا جورجیوا سے ملاقات کے موقع پر سری لنکا کے صدر نے زور دیا تھا کہ آئی ایم ایف پاکستان کی ضرور مدد کرے۔ سری لنکا کے صدر نے ایم ڈی آئی ایم ایف سے کہا تھا کہ ڈیفالٹ کی وجہ سے سری لنکا کو شدید مصائب کا شکار ہونا پڑا، پاکستان کو اس صورتحال سے بچایا جائے۔
سری لنکا کے صدر نے وزیراعظم شہباز شریف کی طرف سے نیک تمناؤں کے اظہار پر شکریہ ادا کیا اور خیر سگالی جذبات کا اظہار کرتے ہوئے کہا پاکستان ہمارا قریبی دوست ہے، دوستوں کی مدد کرنا ہی دوستی ہے۔ سری لنکا کے صدر نے وزیر اعظم شہباز شریف کی پاکستان کے لیے مشکل حالات میں کی گئی کاوشوں کو سراہا اور آئی ایم ایف معاہدہ طے پانے پر وزیراعظم کو مبارک پیش کی۔
