سانحہ 9 مئی سے متعلق مزید تصاویر منظرعام پر آ گئیں، نئی معلومات شرپسندوں کے موبائل کی فرانزک رپورٹ میں سامنے آئی ہیں۔
نئی معلومات کے مطابق 9 مئی کو شرپسندوں نے آرمڈ فورسز انسٹیٹیوٹ آف کارڈیالوجی راوالپنڈی اور ملٹری اسپتال راولپنڈی پر بھی حملہ کیا اور ائر فورس بیس سرگودھا حتیٰ کہ عسکری تعلیمی اداروں کو بھی نہ بخشا۔
شرپسندوں نے پاک امارات اسپتال راولپنڈی کی عمارت کو نقصان پہنچایا اور اس اسپتال سے ملحقہ اسٹینڈ بائے جنریٹر روم کو آگ لگا دی۔ جنریٹر کو آگ لگنے سے اسپتال کی بجلی منقطع ہو گئی، بجلی نہ ہونے سے ایمرجنسی میں وینٹی لیٹرز اور بچوں کے انکیوبیٹرز بھی بند ہو گئے اور مریضوں کی حالت تشویشناک ہو گئی۔
مزید پڑھیں
احتجاج کے بہانے شرپسندوں نے سی ایس ڈی لاہور سے لاکھوں روپے کیش بھی لوٹ لیا، شرپسندوں نے عسکری تاریخ اور جنگوں میں پاک فوج کی یونٹوں کا ریکارڈ رکھنے والے ادارے ’آرمی انسٹیٹیوٹ آف ملٹری ہسٹری راولپنڈی‘ پر دھاوا بول کر ریکارڈ بھی جلا دیا۔
شرپسندوں کی جانب سے چکدرہ قلعے پر حملہ کر کے پورے قلعے کو جلا دیا گیا، قلعے میں موجود تمام ریکارڈ اور گاڑیوں کو بھی آگ لگا دی گئی۔ لیفٹیننٹ سجاد عالم شہید کی یادگار پر ان کی تصویر کو جلا کر عمران خان زندہ باد لکھ دیا گیا۔
