عدالت نے مونس الٰہی کو اشتہاری قرار دیتے ہوئے کارروائی شروع کر دی

لاہور کی سیشن عدالت نے ایف آئی اے منی لانڈرنگ اور کرپشن سرکل کے مقدمے میں ملوث سابق وفاقی وزیر مونس الہٰی کو اشتہاری قرار دیتے ہوئے کارروائی کا آغاز کر دیا، تحریری حکم نامہ بھی جاری کر دیا گیا۔

تحریری حکم نامہ کے مطابق لاہور کی سیشن عدالت کے جوڈیشل مجسٹریٹ نے ایف آئی کی درخواست پر منی لانڈرنگ میں ملوث سابق وفاقی وزیرمونس الہٰی کے خلاف ناقابل ضمانت گرفتاری کے وارنٹ جاری کیے تھے۔

جس پر ایف آئی اے نے کارروائی کا آغاز کرتے ہوئے ملزم مونس الٰہی کے گھر پر چھاپہ  مارا، جہاں وہ موجود نہیں تھے، ایف آئی اے نے عدالت کو آگاہ کیا جس پر عدالت نے ملزم کے ملک سے فرار ہونے کے باعث کارروائی کا آغاز کرتے ہوئے مونس الٰہی کو اشتہاری قرار دیا اور فی الفور کارروائی کرنے کا حکم دیا۔

عدالت کا کہنا ہے کہ مونس الٰہی کیخلاف منی لانڈرنگ کے 2 مقدمے درج ہیں، جس میں سے ایک اربوں روپے غیر قانونی طریقے سے ملک سے باہر لے جانے کا مقدمہ ہے جبکہ دوسرا اینٹی کرپشن سرکل پنجاب میں بھی مونس الہٰی کیخلاف مقدمہ درج کر لیا گیا ہے۔

مونس الٰہی سمیت دیگر 3 ملزمان کیخلاف چالان عدالت میں جمع کر دیا گیا ہے، عدالت نے مونس الہٰی کی ٹریول ہسٹری، بینک اکاؤنٹس کی تفصیلات بھی طلب کر لی ہیں۔

عدالت نے مونس الٰہی کا شناختی کارڈ، پاسپورٹ، بینک اکاؤنٹ، تمام جائیداد کے منجمد ہونے کی کارروائی کا آغاز کر دیا ہے، عدالت نے پاسپورٹ، شناختی کارڈ اور رہائش گاہ کا درست ایڈریس بھی طلب کیا ہے۔