سابق وزیر اعظم میاں محمد نواز شریف نے کہاکہ اوورسیز پاکستانیوں اور بزنس کمیونٹی نے مشکل وقت میں پاکستان کی معیشت کو سنبھالا دیا ہے، آپ لوگ ہی ہمارا سرمایہ ہیں۔
سابق وزیر اعظم نواز شریف نے سعودی عرب کے شہر جدہ میں پاکستانی تاجروں سے ملاقات کی، تاجر برادری نے پاکستان مسلم لیگ ن سعودی عرب کے مرکزی جنرل سیکرٹری ملک منظور حسین اعوان کی قیادت میں ملاقات کی۔
ملاقات میں بزنس کمیونٹی کے وفد میں شامل ملک محمد عاشق، حیات خان، رانا محمد اشرف سمیت صدر مسلم لیگ ن یوتھ ونگ سعودی عرب حافظ امان اللہ، فدا محمد اور محمد شہباز مغل بھی موجود تھے۔
مزید پڑھیں
وفد نے میاں محمد نواز شریف کی قیادت پر اعتماد کا اظہار کرتے ہوئے نیک خواہشات کا اظہار کیا، قائد مسلم لیگ ن محمد نواز شریف نے پاکستانی بزنس کمیونٹی کا خیر مقدم کیا۔
نواز شریف نے تاجر برادری کو سراہتے ہوئے کہاکہ آپ ہمارا سرمایہ ہیں، اس مشکل وقت میں اوورسیز پاکستانی اور بزنس کمیونٹی نے معیشت کو سنبھالا دیا ہے۔
تاجر برادری نے نواز شریف کی قائدانہ صلاحیتوں کو سراہتے ہوئے کہاکہ آپ کی قیادت میں پاکستان ترقی کی راہ پر گامزن ہوا اور انشاءاللہ آئندہ بھی ہوگا۔ آپکے قائدانہ اور مدبرانہ ویژن نے ملکی معاشی صورتحال کو دلدل سے نکالا ہے۔
قائد مسلم لیگ ن محمد نواز شریف نے وفد کی جانب سے نیک خواہشات پر شکریہ ادا کیا۔
