لاہور ہائیکورٹ نے تحریم الہی کا نام ای سی ایل سے نکالنے کے لیے درخواست پر وفاقی سیکریٹری داخلہ سمیت دیگر حکام کو نوٹس جاری کرتے ہوئے جواب طلب کرلیا ہے۔
لاہور ہائیکورٹ میں سابق وزیراعلی پنجاب چوہدری پرویز الہی کے صاحبزادے مونس الہی کی اہلیہ تحریم الہی کا نام ای سی ایل سے نکالنے کے لیے دائر درخواست کی سماعت جسٹس شجاعت علی خان نے کی۔
درخواست میں مؤقف اختیار کیا گیا ہے کہ تحریم الہی دوہری شہریت رکھتی ہیں، ان کے 4 بچے برطانیہ میں رہائش پذیر ہیں، درخواست گزار کے پاس کوئی پبلک آفس نہیں ہے۔
درخواست میں کہا گیا ہے کہ درخواست گزار کو ایف آئی اے نے جنوری 2023 میں طلبی کے نوٹسز دیے اور دوران انکوائری درخواست گزار کو منی لانڈرنگ کے مقدمے میں نامزد کردیا ہے۔
’مقدمے میں قانون کے مطابق عبوری ضمانت کروا رکھی ہے، سیاسی بنیادوں پر نام ای سی ایل میں شامل کیا گیا۔‘
درخواست گزار نے عدالت سے استدعا کی ہے کہ عدالت درخواست گزار کا نام ای سی ایل سے نکالنے کا حکم دے اور درخواست گزار کو ایک بار بیرون ملک سفر کی اجازت دی جائے۔
عدالت نے وفاقی سیکریٹری داخلہ سمیت دیگر حکام کو نوٹس جاری کرتے ہوئے جواب طلب کرلیا اور سماعت 31 جولائی تک ملتوی کردی
