کراچی کی مقامی عدالت نے پولیس کو پاکستان تحریک انصاف (پی ٹی آئی) کے رہنما حلیم عادل شیخ کی کسی بھی گمنام ایف آئی آر یا ایم پی او کے تحت گرفتاری سے روک دیا۔
حلیم عادل شیخ کی ممکنہ گرفتاری اور خفیہ انکوائریوں کے خلاف درخواست کی سماعت ہوئی۔ درخواست حلیم عادل شیخ کے بیٹے حسن عادل شیخ نے راج علی واحد ایڈووکیٹ کے توسط سے دائر کی تھی۔
راج علی واحد ایڈووکیٹ نے عدالت کو بتایا کہ پی ٹی آئی رہنماؤں کے خلاف کریک ڈاؤن جاری ہے اس لیے حلیم عادل شیخ روپوش ہیں۔ انہوں نے عدالت کے یہ بھی گوش گزار کیا کہ حلیم عادل شیخ کے خلاف جتنے معلوم مقدمات ہیں ان میں ضمانت حاصل کر لی گئی ہے۔
سرکاری وکیل نے تحریری جواب جمع کرایا۔ حلیم عادل شیخ کے خلاف کراچی میں 12 انکوائریاں جاری ہیں۔
عدالت نے پولیس کو حکم دیا کہ اس کی اجازت کے بغیر حلیم عادل شیخ کو گرفتار نہ کیا جائے۔
