سپریم کورٹ نے عمران خان کی توشہ خانہ مقدمے کی کارروائی فوری روکنے کی استدعا مسترد کردی، عدالت نے ریمارکس دیے کہ پہلے ہائیکورٹ کو فیصلہ کرنے دیں ہو سکتا ہے کہ جو فیصلہ آپ چاہتے ہیں وہ ہائیکورٹ سے ہی آجائے۔
سپریم کورٹ آف پاکستان میں چئیرمین پی ٹی آئی عمران خان کی توشہ خانہ کیس میں اسلام آباد ہائیکورٹ کے 27 جولائی کے فیصلے کیخلاف دائر اپیل پر 3 رکنی بینچ نے سماعت کی۔
جسٹس یحیٰی آفریدی کی سربراہی میں قائم تین رکنی خصوصی بینچ میں جسٹس مظاہر نقوی اور جسٹس مسرت ہلالی شامل ہیں۔
مزید پڑھیں
چئیرمین پی ٹی آئی عمران خان کے وکیل خواجہ حارث روسٹرم پرآٸے تو جسٹس یحیٰی آفریدی نے استفسار کیاکہ جو ریلیف آپ نے مانگا عدالت نے دے دیا تھا، حیرت ہے آپ نے پھر بھی سپریم کورٹ سے رجوع کیا ہے۔ ہائیکورٹ میں کیس اب کب کے لیے مقرر ہے؟
جس پر عمران خان کے وکیل خواجہ حارث نے کہاکہ کیس کل ہائیکورٹ میں سماعت کے لئے مقرر ہے، لیکن اصل سوال دائرہ اختیار کا ہے۔
جسٹس یحیٰی آفریدی نے پھر استفسار کیاکہ آپکی درخواست غیرمؤثر ہوچکی تھی پھر بھی ہم نے سنا اور آرڈر دیا، ہم صورتحال کو سمجھ رہے ہیں، ہم نے سمجھا ہائی کورٹ آپ کو بہتر آرڈر دے گی۔
جسٹس یحیٰی آفریدی نے کہاکہ ہم نے لکھا بھی تھاکہ ہائیکورٹ درخواستوں کو اکھٹا سنے، ہوسکتا ہے جو ریلیف آپ مانگ رہے ہیں ہائیکورٹ وہی فیصلہ کردے۔ پہلے ہائیکورٹ کو فیصلہ کرنے دیں۔
وکیل خواجہ حارث نے کہاکہ ہائیکورٹ نے حکم امتناع نہیں دیا اس لیے سپریم کورٹ آئے ہیں۔
جس پر عدالت نے عمران خان کی توشہ خانہ مقدمے کی کارروائی فوری روکنے کی استدعا مسترد کردی اور ریسپانڈنٹ ڈسٹرکٹ الیکشن کمیشن کو نوٹس جاری کرتے ہوئے سماعت پرسوں تک ملتوی کر دی۔
