پی آئی اے نے اپنا حج آپریشن 2023 مکمل ہوگیا ہے۔ قومی ایئرلائن کی 96 فیصد بروقت حج پروازوں کے ذریعہ 60 ہزار سے زائد حجاج وطن واپس پہنچ چکے ہیں۔
ترجمان پی ائی اے کے مطابق قومی ایئر لائن کا رواں برس 21 مئی کو شروع ہونا والا حج آپریشن 2 اگست کی شب مکمل ہوگیا ہے۔ ’پی آئی اے کا قبل از حج آپریشن 21 مئی سے شروع ہوا اور 22جون تک جاری رہا جب کہ بعد از حج آپریشن 2 جولائی سے شروع ہو کر 2 اگست کو اختتام پذیر ہوا۔ ‘
بعد از حج آپریشن میں کل 258 پروازیں آپریٹ کی گئیں جس میں جدّہ کے لیے 136 اور مدینہ کے لیے 122 پروازیں آپریٹ ہوئیں ۔حج آپریشن میں پی آئی اے کے شیڈول کی باقاعدگی شاندار رہی۔
’ 96 فیصد پروازیں وقت پر یا وقت سے تھوڑا قبل روانہ ہوئیں جو کہ حج آپریشن میں شامل تمام ایئرلائنز سے بہتر کارکردگی تھی۔ پی آئی اے کی حج پروازوں سے کل 61,461 حجا ج کرام مقدس فریضے کی ادائیگی کے بعد وطن واپس پہنچے ہیں۔‘
ترجمان کے مطابق حجاج کرام کیلئے سٹی چیک ان کا بندوبست بھی کیا گیا تھا جس سے ان کو کئی گھنٹے قبل ائیرپورٹ پہنچنے کی زحمت نہیں ہوئی۔
سی ای او پی ائی اے نے حج آپریشن میں شامل ٹیموں کی کارکردگی کو سراہا ۔ ان کا کہنا تھا کہ مشکل حالات کے باوجود حج آپریشن اعلی طریقے سے منظم کیا گیا جس کے لیے پاکستان اورسعودی عرب میں موجود ٹیمیں قابل ستائش ہیں۔
