اسلام آباد پولیس نے شہزاد ٹاؤن کے علاقے میں بچیوں کے ساتھ زیادتی کے بڑھتے واقعات کے خلاف کارروائی کرتے ہوئے 2 ملزمان کو گرفتار کرلیا ہے۔
اسلام آباد پولیس کے آفیشل ٹوئٹر ہینڈل سے کی جانے والی ٹوئٹ کے مطابق اسلام آباد کے آئی سی سی پی او ڈاکٹر اکبر ناصر خاں نے جنسی ہراسگی کے بڑھتے ہوئے واقعات کا نوٹس لیتے ہوئے ان شرمناک واقعات میں ملوث ملزمان کی فوری گرفتاری کے احکامات دیے تھے۔
اسلام آباد کیپیٹل پولیس کی بڑی کارروائی۔
شہزاد ٹاؤن کے علاقوں میں بچیوں کے ساتھ زیادتی کے ملزمان گرفتار۔
آئی سی سی پی او ڈاکٹر اکبر ناصر خاں نے واقعات کا نوٹس لے کر ملزمان کو جلداز جلد گرفتاری کے احکامات دئیے تھے۔
پولیس نے دو ملزمان کو جدید ٹیکنالوجی اور انسانی ذرائع سے ٹریس…
— Islamabad Police (@ICT_Police) August 3, 2023
پولیس نے ملزمان کے گرفتاری کے لیے جدید ٹیکنالوجی کا استعمال کیا، جس کے نتیجے میں 2 ملزمان کو گرفتار کر لیا گیا۔
تفتیشی ٹیموں نے 800 گھروں سے کوائف اکٹھے کیے
پولیس کے مطابق ملزمان کو جدید ٹیکنالوجی اور انسانی ذرائع سے ٹریس کرکے گرفتار کیا گیا۔ ملزمان کمسن بچیوں کے ساتھ زیادتی کے مقدمات میں ملوث تھے۔
ملزمان کی گرفتاری کے لیے تفتیشی ٹیموں نے 800 گھروں سے کوائف اکٹھے کیے جن کی تصدیق نادرا ڈیٹا سے کروائی گئی۔ اس کے علاوہ علاقے میں مختلف مقامات پر سرچ آپریشن کیا گیا اور اس دوران ڈی این اے نمونے اکٹھے کیے گئے۔
پولیس کے مطابق گرفتار ملزمان کا عدالت سے جسمانی ریمانڈ حاصل کر کے مزید تفتیش جاری ہے۔
خواتین اور بچوں پر تشدد اور زیادتی ناقابل برداشت ہے
آئی سی سی پی او ڈاکٹر اکبر ناصر خاں نے پولیس ٹیموں کو بروقت ملزمان کو گرفتار کرنے پر شاباش دی ہے اور اس عزم کا اظہار کیا ہے کہ واقعے میں ملوث ملزمان کو قرار واقعی سزا دلوانے کے لیے قانونی تقاضے پورے یئے جائیں گے۔
ڈاکٹر اکبر ناصر خاں کے مطابق خواتین اور بچوں پر تشدد اور زیادتی ناقابل برداشت ہے۔ شہریوں کی جان و مال کی حفاظت اسلام آباد پولیس کی اولین ترجیحات میں شامل ہے۔