پاکستان تحریک انصاف (پی ٹی آئی) کے رہنما صمصام بخاری کی مبینہ آڈیو سامنے آئی ہے جس میں 9 مئی سے متعلق اہم انکشافات سامنے آئے ہیں۔
آڈیو لیک میں پی ٹی آئی رہنما صمصام بخاری کہہ رہے ہیں کہ ’3 دن پہلے تحریک انصاف کی کور کمیٹی کی ایک میٹنگ رکھی گئی، جس میں شہریار آفریدی، قاسم سوری، مراد سعید اور شفقت محمود شریک تھے‘۔
صمصام بخاری کے مطابق کور کمیٹی اجلاس میں فیصلہ ہوا کہ تحریک انصاف نے جو بھی احتجاج کرنا ہے فوجیوں کے خلاف کرنا ہے، اللہ پاک نے بچت رکھی کہ وہ (صمصام بخاری خود) ادھر نہیں تھے، سچی بات یہ ہے کہ میری طبیعت ٹھیک نہیں تھی اور دوسرا ان کو معلوم تھا کہ انہوں (پی ٹی آئی رہنماؤں) نے اُدھر فساد کرنا ہے۔
صمصام بخاری کی تہلکہ خیز گفتگو جس میں وہ ایک دوسرے شخص کو بتا رہے ہیں کہ 9 مئی کے واقع کی منصوبہ بندی تحریک انصاف کور کمیٹی میں ہوئی جس میں قاسم سوری ، شہریار آفریدی اور مراد سعید وغیرہ شامل تھے ۔۔ میٹنگ میں فیصلہ کیا گیا تھا کہ فوج کو ٹارگٹ کرنا ہے ۔ pic.twitter.com/xkn5w9RrQC
— Hassan Ayub Khan (@HassanAyub82) August 7, 2023
عمران خان کی گرفتاری کی بعد پیش آنے والی صورتحال پر صمصام بخاری کہہ رہے تھے کہ ’میں نے کہا میں تو اوکاڑہ میں ہوں، میں نہیں آسکتا‘۔
آڈیو میں وہ پی ٹی آئی رہنما شفقت محمود کے متعرف نظر آئے اور انہوں نے کہا کہ ’شفقت محمود بہت سمجھدار آدمی ہیں، جب پی ٹی آئی رہنماؤں نے کہا کہ اب وہ کور کمانڈر ہاؤس جائیں گے تو شفقت محمود نے انہیں کہا کہ آپ اُدھر نہ جائیں، ایسا کرکے آپ پارٹی تباہ کردیں گے لیکن انہوں نے کہا کہ صاحب کا حکم ہے، لہٰذا شفقت محمود نے گاڑی اسٹارٹ کی اور اپنے گھر آگئے‘۔