پاکستان تحریک انصاف نے چیئرمین پی ٹی آئی عمران خان کو اٹک جیل میں نہایت ناگفتہ بہہ اور غیرانسانی ماحول میں قید کیے جانے کی مذمت کی ہے۔
پاکستان تحریک انصاف کے کور کمیٹی اجلاس کے اعلامیہ میں کہا گیا ہے کہ قوم کے معتبر ترین قائد، پاکستان کی سب سے بڑی جماعت کے سربراہ اور سابق وزیراعظم کو جس اذیت ناک، غیرانسانی اور صحت و سلامتی کے حوالے سے خطرناک ماحول میں قید کیا گیا ہے وہ شرمناک ہے۔
’نفرت و انتقام کی آگ میں قانون و اقدار کا خون کرنے والے فسطائی قوم کو اپنی وحشت کا جواب دیں گے‘۔
پاکستان تحریک انصاف کی کور کمیٹی کا اعلامیہ pic.twitter.com/OPMKIpop2y
— PTI (@PTIofficial) August 7, 2023
پی ٹی آئی کور کمیٹی نے کہا ہے کہ خیبرپختونخوا میں ہونے والے بلدیاتی انتخابات میں تحریکِ انصاف کی فقیدالمثال کامیابی عمران خان پر قوم کے اعتماد کا مظہر ہے۔
اجلاس نے کہا کہ چیئرمین تحریک انصاف نے پیش گوئی کی تھی کہ انہیں قید کیا جائے یا وہ آزاد ہوں، عوام تحریک انصاف ہی کو اپنے ووٹ کا حقدار تصوّر کرتے ہیں۔
پی ٹی آئی نے کہا کہ شاندار کامیابی پر صدر پی ٹی آئی خیبرپختونخوا علی امین گنڈا پور، صوبائی تنظیم، کارکنان اور عوام کو مبارکباد پیش کرتے ہیں۔
یہ بھی کہا گیا کہ مشترکہ مفادات کونسل کے ذریعے ملک میں آئینی و جمہوری بحران پیدا کرنے کی حکومتی کوششوں کی شدید مذمت کرتے ہیں۔ پاکستان کا مستقبل آئین کی روح کے مطابق صاف شفاف انتخابات میں پوشیدہ ہے۔
مزید پڑھیں
پی ٹی آئی کور کمیٹی کے مطابق مردم شماری اور حلقہ بندیوں میں ردوبدل کی آڑ میں انتخابات کے غیرمعینہ مدت تک التوا کی ناپاک سازش کی جارہی ہے۔
اجلاس نے کہا کہ نااہل، بددیانت، بدنیّت اور منافقت کی آخری حدوں کو چھوتا بندوبست اپنی صفوں میں موجود واضح تقسیم چھپا کر جمہوریت پر شب خون مارنے کی کوششوں میں مصروف ہے۔
تحریک انصاف عوامی منشاء کی روشنی میں آئین، جمہوریت اور انتخاب کے خلاف کی جانے والی ہر سازش کا ہر سطح پر ہر ممکنہ آئینی، قانونی اور جمہوری طریقے سے مقابلہ کرے گی۔
یہ بھی کہا گیا کہ چند گھنٹوں کی مہمان حکومت کے ہاتھوں عوام کے معاشی قتلِ عام کی بھی شدید مذمت کرتے ہیں۔
کور کمیٹی کی جانب سے 8 اگست بروز منگل اسلام آباد میں منعقد ہونے والے وکلا کنونشن کی بھرپور تائید کا اعلان کیا گیا ہے۔
واضح رہے کہ ”رول آف لا، سپرمیسی آف کانسٹیٹیوشن اور ایکویلیٹی بیفور لاء“ کے عنوان تلے وکلا کا قومی کنونشن 8 اگست صبح گیارہ بجے اسلام آباد ڈسٹرکٹ بار روم میں منعقد کیا جائے گا۔
کنونشن میں ممتاز ماہرینِ قانون، وکلاء نمائندگان اور قانون، انصاف اور انسانی حقوق کے ماہرین کنونشن میں شریک ہوں گے۔
