حالیہ دہشتگردی کے تناظرمیں حکومتِ پاکستان کے شدید رد عمل کے بعد افغان سپریم لیڈر شیخ ہیبت اللہ اخوندزادہ نے اپنے شہریوں پر افغانستان کی سرحد کے پار جہاد پر پابندی عائد کردی ہے۔
افغان سپریم لیڈر شیخ ہیبت اللہ اخوندزادہ کے سخت احکامات کے مطابق کوئی بھی افغان شہری اور افغان عبوری حکومت کا رکن جہاد اور عسکریت پسندی کے لیے افغانستان کی سرحد پار نہیں کرے گا۔
’جو لوگ عسکریت پسندی کے لیے پاکستان گئے، اگر مارے گئے تو وہ شہید نہیں کہلائیں گے، بلکہ ان کی موت کو ناپاک قرار دیا جائے گا۔ ان احکامات کی خلاف ورزی کرنے والوں کو مزید افغانستان کی عبوری حکومت کا حصہ نہیں سمجھا جائے گا۔‘
افغان سپریم لیڈر نے واضح کیا ہے کہ پاکستان میں کسی بھی افغان شہری کے قتل کے بعد عبوری افغان حکومت کا کوئی نمائندہ اس کے جنازے میں شرکت نہیں کرے گا۔
کچھ روز قبل وزارتِ دفاع کے دورے کے دوران افغان وزیر دفاع ملا یعقوب نے واضح احکامات دیے ہیں کہ اس بات کو یقینی بنایا جائے کہ افغانستان سے باہر کسی جنگ میں افغان شہریوں کی شرکت نہ ہو۔ انہوں نے اس ضمن میں افغان سپریم لیڈر شیخ ہیبت اللہ اخوندزادہ کے احکامات کی تعمیل کی بھی ہدایت کی۔
ملا یعقوب نے تمام مجاہدین کو مشورہ دیا کہ وہ کہیں اور لڑنے کے بجائے افغانستان کی تعمیر نو میں تعاون کریں۔ افغانستان کی فلاح و بہبود اور تعمیر نو کے لیے کام کرنا عبوری افغان حکومت کے مجاہدین کے لیے اصل جہاد ہے۔ ’افغان شہریوں اور مجاہدین کی افغان سے باہر شرکت کو جنگ تصور کیا جائے گا، اور اسے جہاد نہیں کہا جائے گا۔‘
