امریکا میں پاکستانی سفیر کی جانب سے بھجوائے گئے خفیہ مراسلے (سائفر) کے حوالے سے عالمی میڈیا میں چھپنے والی خبر کے معاملہ پر پاکستان تحریک انصاف نے دی انٹرسیپٹ کی خبر پر باضابطہ اعلامیہ جاری کر دیا۔
تحریک انصاف کے اعلامیے کے مطابق خفیہ مراسلے (سائفر) کے حوالے سے منظرِعام پر آنے والی تفصیلات نے عمران خان کے مؤقف کی صحت اور ساکھ پر مہرِ تصدیق ثبت کی ہے۔
اعلامیے میں کہا گیا ہے کہ عمران خان کی آئینی و جمہوری حکومت کے خلاف ایک سازش کے نتیجے میں تحریک عدمِ اعتماد لائی گئی۔ تحریک عدم اعتماد کے تناظر میں سائفر پر عمران خان کا مؤقف آج پوری طرح ثابت ہوا۔
قومی سلامتی کمیٹی نے سائفر کے مندرجات کو پاکستان کے اندرونی معاملات میں صریح مداخلت قرار دیا
اعلامیے کے مطابق وزیراعظم عمران خان کی زیر صدارت قومی سلامتی کمیٹی نے سائفر کے مندرجات کو پاکستان کے اندرونی معاملات میں صریح مداخلت قرار دیا۔ علاوہ ازیں اجلاس میں پاکستان کے اندرونی معاملات میں مداخلت کو کسی طور ناقابلِ قبول قرار دیا گیا۔
اعلامیے کے مطابق قومی سلامتی کمیٹی نے متفقہ فیصلہ بھی کیا پاکستان امریکا سے سفارتی آداب کے مطابق ڈیمارش کے ذریعے شدید احتجاج کرے گا۔بعد ازاں وزیراعظم شہباز شریف کی زیرِ صدارت قومی سلامتی کمیٹی کے اجلاس میں ان تمام فیصلوں کی مکمل تائید و توثیق کی گئی۔
اعلامیے میں کہا گیا ہے کہ حکمران گروہ نے اس خفیہ مراسلے (سائفر) کی اہمیت و مطابقت کو کم کرنے کے لیے بار بار اپنے پاؤں پر کلہاڑی چلائی۔حکمران گروہ نے سائفر کے وجود سے انکار کیا تو کبھی اسے بےمعنی اور بے وقعت قرار دیا۔
خفیہ مراسلے پر کی جاننے والی بحث و تمحیص کو اس کے ٹھیک تناظر میں رکھا جائے
اعلامیے کے مطابق سائفر کو منظرِعام پر لانے کا الزام چیئرمین پاکستان تحریک انصاف پر عائد کرنے کی کوشش کی ذریعے ایک اور حماقت کی گئی، لازم ہے کہ اس خفیہ مراسلے پر کی جاننے والی بحث و تمحیص کو اس کے ٹھیک تناظر میں رکھا جائے۔
اعلامیے میں مطالبہ کیا گیا ہے کہ تسلیم کیا جائے کہ فی الواقع پاکستان کے اندرونی معاملات میں مداخلت کی گئی، پاکستان کے اندرونی معاملات میں مداخلت وزیراعظم عمران خان کیخلاف تحریک عدمِ اعتماد پر منتج ہوئی۔
ہمارا پھر سے یہی مطالبہ ہے کہ معاملے کی جامع تحقیقات کیلئے ایک بااختیار اور اعلیٰ سطحی عدالتی کمیشن تشکیل دیا جائے۔سائفر پر عدالتی کمیشن کی تحقیقات کو منظرِ عام پر لایا جائے۔
