پاکستان تحریک انصاف (پی ٹی آئی) کے رہنما فرخ حبیب کے ایک ٹوئٹ کے مطابق سابق وزیراعظم عمران خان کی اہلیہ بشریٰ بی بی کی اپنے شوہر سے اٹک جیل میں ملاقات ہوگئی ہے اور اطلاعات یہ ہیں کہ چیئرمین پی ٹی آئی کا سیل اتنا تنگ ہے کہ اس میں بیگ تک نہیں رکھا جاسکتا۔
فرخ حبیب نے بتایا کہ عمران خان صاحب کو ایک چھوٹے سیل میں قید تنہائی میں رکھا گیا ہے اور ان کے سیل میں جگہ اتنی تنگ ہے کہ وہ وہاں اپنے سامان کا بیگ بھی نہیں رکھ سکتے۔
سیل میں بغیر دروازے کا ایک کھلا واش روم ہے جس میں ایک پانی کی بالٹی رکھی ہے جو رفع حاجت اور نہانے دونوں مقاصد کے لیے ہے جب کہ ان کے سیل کے قریب عملے کا کوئی رکن تک نہیںکہ جس سے کوئی بات کی جاسکے۔
بشری بی بی کی عمران خان سے ملاقات ہو گئی ہے اطلاعات کے مطابق عمران خان صاحب کو ایک چھوٹے سیل میں قید تنہائی میں رکھا ہوا ہے وہ سیل میں جگہ اتنی تنگ ہے کہ اپنے سامان کا بیگ بی وہاں نہیں رکھا جاسکتا اس سیل میں کھلا واش روم جس میں ایک پانی کی بالٹی ہے وہی نہانے اور وہی بالٹی سے…
— Farrukh Habib (@FarrukhHabibISF) August 15, 2023
ٹوئٹ میں مزید کہا گیا کہ عمران خان کو جیل میں بہتر کلاس کی سہولت مہیا نہیں کی گئی ہے اور انہیں اسلام آباد ہائی کورٹ کے فیصلے کے باوجود انگریزی ترجمے والاقرآن پاک بھی ابھی تک فراہم نہیں کیا گیا ہے۔
فرخ حبیب کا کہنا تھا کہ ان باتوں کے باوجود عمران خان اس سارے ظلم و ستم کا ڈٹ کر مقابلہ کررہے ہیں۔ انہوں نے مطالبہ کیا کہ چیف جسٹس عامر فاروق صاحب اپنے فیصلہ پر عملدرآمد کروائیں۔
مزید برآں عمران خان صاحب سے ان کے وکلا کو ملنے نہیں دیا جارہا ہے جو عدالتی فیصلے اور قانون کی خلاف ورزی ہے۔