گورنر پنجاب محمد بلیغ الرحمان سے امریکی قونصل جنرل ولیم کے مکانیولے نے الوداعی ملاقات کی اور تعلیم، تجارت اور ماحولیاتی تبدیلیوں سمیت مختلف امور پر تبادلہ خیال کیا۔
اس موقع پر گورنر پنجاب نے امریکی قونصل جنرل کی تعیناتی کے دوران پاک امریکا تعلقات کو بہتر بنانے میں سفارتی کوششوں اور ولیم کے مکانیولے کے کیلیفورنیا اور پنجاب کے سسٹر اسٹیٹ کے معاہدے میں متحرک کردار کو سراہا۔
محمد بلیغ الرحمان نے کہا کہ پاکستان اور امریکا کے درمیان طلبا، اساتذہ اور بزنس وفود کے زیادہ سے زیادہ تبادلے ہونے چاہییں اور دونوں ممالک کے مابین دو طرفہ تجارت کو مزید فروغ دینے کی ضرورت ہے۔
انہوں نے کہا کہ امریکہ تعلیم کے شعبے میں پاکستانی طلبہ کو فل برائیٹ اسکالر شپ اور دیگر تعلیمی اسکالرشپس دے رہا پے اور امید ہے کہ ان کی تعداد میں اضافہ کیا جائے گا۔
گورنر پنجاب نے کہا کہ ماحولیاتی تبدیلیوں کی وجہ سے پاکستان کو سیلاب کی تباہ کاریوں کا سامنا کرنا پڑا اور زراعت پر بھی ماحولیاتی تبدیلیوں کے بڑے اثرات مرتب ہو رہے ہیں۔
انہوں ے کہا کہ پاکستان میں تعلیم سمیت مختلف شعبوں میں خواتین کی نمائندگی بڑھ رہی ہے۔
