شاہ رخ خان کی جگہ رنویرسنگھ کو ڈان 3 میں کاسٹ کرنے پر کڑی تنقید کے بعد ڈائریکٹر فرحان اختر نے چپ توڑتے ہوئے کہا ہے کہ رنویر سنگھ بہت اچھا کام کرنے جا رہے ہیں۔ اسی قسم کی باتیں میں نے اس وقت بھی سنی تھیں جب امیتابھ بچن کی جگہ شاہ رخ خان نے لی تھی۔
بی بی سی ایشین نیٹ ورک کو دیے گئے انٹرویو میں فلمساز فرحان اختر نے انکشاف کیا ہے کہ رنویر سنگھ ہماری فرنچائز میں قدم رکھنے کے لیے ’بہت پُرجوش اور پریشان‘ ہیں، کیونکہ جو کردار وہ کرنے جا رہے ہیں وہ پہلے فلم انڈسٹری کے 2 بڑے نام امیتابھ بچن اور شاہ رخ خان کر چکے ہیں۔
فرحان اختر نے تنقید کا جواب دیتے ہوئے کہا کہ ’رنویر سنگھ حیران کر دینے والے اداکار ہیں، وہ آپ کے تصور سے زیادہ پرفارم کر سکتے ہیں۔ جب شاہ رخ خان کو اس کردار کے لیے منتخب کیا گیا تھا تو ہم اسی تنقیدی اور جذباتی عمل سے گزرے تھے، ہر کوئی کہہ رہا تھا کہ ’آپ مسٹر بچن کی جگہ شاہ رخ کو کیسے لے سکتے ہیں؟ لیکن پھر جو ہوا وہ تاریخ ہے۔
مزید پڑھیں
فرحان خان کا کہنا تھا کہ بطور ہدایتکار یہ ان کی ذمہ داری ہے اس بات کو یقینی بنائیں کہ فلم اسکرپٹ اور تصور کے عین مطابق بنے۔
فرحان اختر اور رتیش سدھوانی کے پروڈکشن ہاؤس ایکسل انٹرٹینمنٹ نے گزشتہ ہفتے ڈان 3 کے لیے رنویر سنگھ کی پہلی جھلک شیئر کی تھی۔ جس پر کافی حد تک منفی رد عمل سامنے آیا تھا، یہاں تک کہ بہت سے لوگوں نے اسے پیروڈی قرار دے دیا تھا۔
یاد رہے کہ شاہ رخ خان نے 2006 میں ریلیز ہونے والی فلم ’ڈان: دی چیز بیگنز اگین‘ اور 2011 میں ریلیز ہونے والی فلم ’ڈان 2: دی کنگ از بیک‘ میں ڈان کا کردار ادا کیا تھا۔ اصل میں یہ فلمی کردار امیتابھ بچن نے 1978 کی فلم ڈان میں ادا کیا تھا جس کے ہدایتکار چندرا باروٹ تھے۔
