عامر، سلمان نہ رنویر ڈان تو صرف شاہ رخ ہی ہوگا، کنگ خان کے پرستار ڈٹ گئے

فرحان اختر کی فلم ڈان 3 کے آفشیل ٹیزر کے بعد سوشل میڈیا پر طوفان آ گیا کیوں کہ سننے میں آ رہا ہے اس فلم میں شاہ رخ خان نہیں بلکہ رنویر سنگھ ڈان کا مرکزی کردار نبھائیں گے اور یہ بات کنگ خان کے پرستاروں کو بالکل پسند نہیں آئی جنہوں نے اپنے پسندیدہ اداکار کی جگہ رنویر سنگھ کو ڈان قبول کرنے سے صاف انکار کر دیا ہے۔

شاہ رخ خان کے ایک فین نے لکھا ہے کہ ’ڈان فلم کی ٹون پر شاہ رخ خان کے علاوہ کوئی اور نہیں جچتا‘۔ کسی دل جلے نے لکھا کہ ’مجھے میرا شاہ رخ خان والا ڈان واپس لا دو‘ تو کسی نے فرحان اختر کو مشورہ دیا کہ تھوڑا انتظار کر لیں مگر یہ کردار شاہ رخ خان سے ہی کروائیں۔

سنہ 1978 میں بالی وڈ کے بے تاج بادشاہ امیتابھ بچن کی فلم ڈان کا ری میک سال 2006 میں فرحان اختر نے ہی بنایا جس کے 5 سال بعد سنہ 2011 میں ڈان 2 بنی اور دونوں ہی فلموں میں کنگ خان ڈان بنے۔

یہ بھی اطلاعات ہیں کہ بالی وڈ کو کئی کامیاب فلمیں دینے والے رنویر سنگھ سنجے لیلا بھنسالی کی فلم ‘بیجو باورا’ کو مکمل کرنے کے بعد ڈان 3 کی شوٹنگ کریں گے۔ امکان ہے کہ رنویر سنگھ پردہ سیمیں پر ڈان بن کر اینٹری سنہ 2025 میں دیں گے۔