کرغزستان کے تجارتی وفد کے سربراہ زومدیل ایجمبردیف نے دو طرفہ تجارتی اور اقتصادی روابط کو بڑھانے کے لیے پاکستانی تاجروں کو کرغزستان کے دورے کی دعوت دی ہے۔
زومدیل ایجمبردیف نے کہا کہ پاکستانی تاجروں کو کرغزستان کے دورے کی دعوت دینے کا مقصد دونوں ممالک کے درمیان باہمی تعاون، سرمایہ کاری کے مواقع اور خاص طور پر فوڈ انڈسٹری میں مشترکہ منصوبوں کا جائزہ لینا ہے۔
پاکستان کے دورے کے آخری مرحلے میں اتوار کو پاکستانی تاجر برادری سے گفتگو کرتے ہوئے زومدیل ایجمبردیف نے کہا کہ دونوں ممالک کے درمیان اقتصادی تعلقات کو فروغ دینے کی بہت زیادہ گنجائش موجود ہے۔
ان کا کہنا تھا کہ دونوں ممالک اپنی صلاحیت اور مہارتوں کو یکجا کر کے باہمی طور پر فائدہ مند شراکت داری قائم کر سکتے ہیں جو دونوں ممالک کی معاشی ترقی میں معاون ثابت ہو گی۔
انہوں نے پاکستانی تاجروں کو دورے کی دعوت دیتے ہوئے کہا کہ ایسے دورے آپ کو کرغزستان کے کاروباری منظرنامے کے بارے میں بھر پور آگاہی فراہم کریں گے۔
اس موقع پر پاکستان میں کرغزستان ٹریڈ ہاؤس کے چیئرمین مہر کاشف یونس نے کہا کہ ان کا بنیادی مقصد ایسا ماحول فراہم کرنا ہے جہاں تبادلہ خیال اور ملاقاتوں کے بعد مشترکہ منصوبوں اور شراکت داری کو فروغ دیا جا سکے۔
انہوں نے کہا کہ شورو کمپنی کےسربراہ اور ہماری ٹیم اس بات کو یقینی بنائے گی کہ پاکستانی تجارتی وفد کا دورہ کرغزستان نتیجہ خیز اور یادگار ہو۔ انہوں نے کہا کہ آئیں ہم مل کر مشترکہ منصوبوں کی بنیاد رکھیں جو ہماری خوشحالی اور معیشتوں کی ترقی کی بنیاد بنیں۔
