سپریم کورٹ آف پاکستان نے توشہ خانہ کیس میں چیئرمین پاکستان تحریک انصاف (پی ٹی آئی) عمران خان کی اپیلیں 23 اگست کو سماعت کے لیے مقرر کر لی ہے۔
چیف جسٹس عمر عطابندیال کی سربراہی میں جسٹس مظاہر علی اکبر نقوی اور جسٹس جمال خان مندوخیل بینچ کا حصہ ہوں گے۔
مزید پڑھیں
چیئرمین پاکستان تحریک انصاف عمران خان نے اسلام آباد ہائیکورٹ کے 3 اگست کے فیصلے کو عدالت عظمیٰ میں چیلنج کیا تھا، عدالت العالیہ نے توشہ خانہ کیس قابل سماعت ہونے کا معاملہ واپس جج ہمایوں دلاور کو بھجوا دیا تھا۔
اس کے علاوہ پی ٹی آئی چیئرمین عمران خان نے توشہ خانہ کیس کا ٹرائل معطل کرنے کی بھی استدعا کی ہے۔
واضح رہے کہ اسلام آباد کی ایڈیشنل سیشن عدالت نے چیئرمین پی ٹی آئی عمران خان کو 5 اگست کو توشہ خانہ کیس میں 3 سال قید اور ایک لاکھ روپے جرمانے کی سزا سنائی تھی، جس کے بعد پولیس نے انہیں زمان پارک لاہور سے گرفتار کیا تھا، وہ اس وقت اٹک جیل میں قید ہیں۔
یہ بھی واضح رہے کہ چیئرمین پی ٹی آئی عمران خان سے جیل میں ہی سائفر کیس کے حوالے سے بھی تحقیقات کی جا رہی ہیں، آفیشل سیکرٹ ایکٹ کے تحت مقدمہ درج ہونے کے بعد ایف آئی اے نے بھی انہیں گرفتار کر لیا ہے۔
