چیف الیکشن کمشنر سکندر سلطان راجہ کی زیر صدارت الیکشن کمیشن آف پاکستان کا اہم اجلاس ہوا ہے، جس میں سیکریٹری الیکشن کمیشن سمیت دیگر سینیئر افسران نے شرکت کی۔
اجلاس میں الیکشن کمیشن کو نتائج مرتب کرنے کے سسٹم پر بریفنگ دی گئی، الیکشن کمیشن کو بتایا گیا کہ اس سسٹم کے تحت پریذائیڈنگ آفیسر کی طرف سے ریٹرننگ آفیسر کے پاس موبائل ایپ کے ذریعے فوری رزلٹ کی ترسیل ممکن ہوگی۔
ریٹرننگ آفیسر اس سسٹم کے تحت فوری اور ووٹوں کے درست اعداد وشمار کے ساتھ غیر حتمی رزلٹ مرتب کر سکے گا۔
اس سسٹم پر باقاعدہ تجربہ بھی کیا گیا، اور تمام مراحل کو چیک کیا گیا، جس پر الیکشن کمیشن کی جانب سے مکمل اطمینان کا اظہار کیا گیا ہے۔
اجلاس میں حلقہ بندی کے کام کا بھی کا جائزہ لیا گیا، الیکشن کمیشن نے صوبائی حکومتوں اور محکمہ شماریات کو ضروری مراسلہ جات بھی روانہ کئے، متعلقہ اداروں کو حلقہ بندیوں کا عمل شروع کرنے کے لیے ضروری نقشہ جات ودیگر ڈیٹا مہیا کرنے کی ہدایت کی گئی۔
