ملک میں آئندہ عام انتخابات کے حوالے سے الیکشن کمیشن نے ملک کی تمام بڑی سیاسی جماعتوں سے مشاورت کا فیصلہ کیا ہے۔ انتخابات کے شیڈول اور انتخابات کی تاریخ سے متعلق سیاسی جماعتوں سے مشاورت کی جائے گی۔
ذرائع کے مطابق الیکشن کمیشن سیاسی جماعتوں سے علیحدہ علیحدہ مشاورت کرے گا۔ الیکشن کمیشن آئندہ انتخابات کے روڈ میپ پر سیاسی جماعتوں سے تبادلہ خیال کرے گا۔
الیکشن کمیشن حلقہ بندیوں اور ووٹرز کی فہرستوں کے امور پر بھی مشاورت کرے گا۔ الیکشن کمیشن کی سیاسی جماعتوں سے ملاقاتیں آئندہ چند روز میں شروع ہوں گی۔
الیکشن کمیشن مسلم لیگ ن، پاکستان پیپلز پارٹی، پاکستان تحریک انصاف، ایم کیو ایم ، جماعت اسلامی، اے این پی، جے یو آئی (ف) سمیت تمام بڑی سیاسی جماعتوں سے مشاورت کرے گا۔
