چیف آف آرمی اسٹاف جنرل سید عاصم منیر نے جنوبی وزیرستان کے علاقے اسمان منزہ کے قریب شیروانگی کا دورہ کیا جہاں گزشتہ روز دہشت گردوں کے خلاف بہادری سے لڑتے ہوئے 6 جوانوں نے شہادت کو گلے لگالیا تھا۔
آئی ایس پی آر کے مطابق اس موقعے پر جنرل سید عاصم منیر کو موجودہ انٹیلیجینس اور انسداد دہشت گردی کی کارروائیوں سمیت سیکیورٹی صورتحال پر تفصیلی بریفنگ دی گئی۔
آرمی چیف نے علاقے میں تعینات افسران اور فوجیوں سے بات چیت کی اور دہشت گردی کی لعنت سے لڑنے میں ان کے غیر متزلزل عزم کو سراہا۔
جنرل سید عاصم منیر نے کہا کہ شہدا ہمارا فخر ہیں اور ان کی تک ان کی قربانیاں رائیگاں نہیں جائیں گی اور ملک میں مکمل امن و استحکام بحال ہوکر رہے گا۔
آرمی چیف نے کہا کہ پاکستان کو غیر مستحکم کرنے کے دشمن ایجنڈے کے تحت کام کرنے والے دہشت گردوں، ان کے ساتھیوں اور ان کی حوصلہ افزائی کرنے والوں کو ریاست پاکستان کے سامنے ہتھیار ڈالنے تک ان کا صفایا کیا جاتا رہے گا۔ قبل ازیں آمد پر کور کمانڈر پشاور نے آرمی چیف کا استقبال کیا۔
