اسلام آباد ہائی کورٹ بار ایسوسی ایشن نے چیف جسٹس ہائی کورٹ جسٹس عامر فاروق کیخلاف مہم چلانے والوں کے خلاف کارروائی کا مطالبہ کردیا۔
اسلام آبادہائیکورٹ بار ایسوسی ایشن نے کہا ہے کہ چیف جسٹس عامر فاروق کے خلاف چلنے والی مہم کی مذمت کرتے ہیں، وہ غیر جانبدار اور دیانت دار جج ہیں۔
ہائیکورٹ بار ایسوسی ایشن کی جانب سے جاری اعلامیہ میں مزید کہا گیا ہے کہ چیف جسٹس عامر فاروق اپنی اصول پسندی کی وجہ سے مشہور ہیں، ان کے خلاف منفی مہم چلانے والوں کے خلاف کارروائی کی جائے۔
مزید پڑھیں
اس سے قبل وزارت قانون و انصاف نے سیاسی جماعتوں کو مخاطب کرتے ہوئے کہا تھا کہ وہ ملکی اداروں پر حملے سے باز رہیں۔
اتوار کو وفاقی وزارت قانون و انصاف کی جانب سے جاری بیان میں چیف جسٹس اسلام آباد ہائی کورٹ پر ایک سیاسی جماعت کی طرف سے سوشل میڈیا کے ذریعے حملے کی شدید مذمت کی گئی ہے۔
بیان میں کہا گیا کہ سیاسی جماعتیں ملکی اداروں پر حملے سے باز رہیں۔
واضح رہے کہ پاکستان تحریک انصاف کی جانب سے چیف جسٹس اسلام آباد ہائیکورٹ کے خلاف سوشل میڈیا پر ایک منظم مہم چلائی گئی تھی۔
تحریک انصاف کے آفیشل ٹوئٹر ہینڈل سے چیف جسٹس اسلام آباد ہائیکورٹ جسٹس عامر فاروق پر منافقت کا الزام لگایا گیا تھا۔
سابق اٹارنی جنرل اشتر اوصاف نے اس معاملے پر کہا تھا کہ ججوں پر ایسے تنقید نہیں ہونی چاہیے۔
