اسلام آباد ہائیکورٹ کے جسٹس ارباب محمد طاہر نے ڈاکٹر نجیبہ عارف کی بطور چئیرپرسن اکادمی ادبیات تعیناتی کیخلاف درخواست میں فریقین کو جواب کے لیے نوٹسز جاری کر دیے ہیں۔
سماعت کے دوران درخواست میں مؤقف اختیار کیا گیا کہ چیئرمین اکادمی ادبیات کا عہدہ اپریل 2023 میں خالی ہوا تھا، آسامی کے لیے اخبارات میں اشتہار دیا گیا، 150 امیدواروں میں سے 7 کو شارٹ لسٹ کیا گیا تھا۔
درخواست مین مزید کہا گیا ہے کہ وزیراعظم آفس نے شارٹ لسٹ کیے گئے امیدواروں کے انٹرویو کیے تھے، وزیراعظم کی منظوری کے لیے بنائی گئی سمری میں ڈاکٹر راشد حمید پہلی پوزیشن پر تھے، تاہم ڈاکڑ راشد کے بجائے ڈاکڑ نجیبہ عارف کو تعینات کر دیا گیا ہے۔
ڈاکڑ راشد حمید نے درخواست میں پرنسپل سیکریٹری کے ذریعے وزیر اعظم سیکرٹریٹ کو فریق بنایا ہے۔ عدالت نے ںوٹس جاری کرتے ہوئے کیس کی سماعت 2 ہفتوں کے لیے ملتوی کر دی ہے۔
