راولپنڈی کے علاقے تھانہ وارث خان کی حدود میں خاتون ٹیچر سے ڈکیتی اور اس پر تشدد کرنے والے ڈاکو کو پولیس نے گرفتار کر لیا۔
راولپنڈی پولیس نے اپنے سوشل میڈیا اکاؤنٹ ایکس پر اپنے پیغام میں بتایا ہے کہ ایک روز قبل تھانہ وارث خان کی حدود میں خاتون ٹیچر سے ڈکیتی اور تشدد کے مقدمے میں اہم پیش رفت ہوئی ہے، پولیس نے ایک ڈاکو کو زخمی حالت میں گرفتار کر لیا۔
مزید پڑھیں
راولپنڈی پولیس کے مطابق اس واردات میں ملوث ڈاکوؤں نے پولیس کی ٹیم پر فائرنگ کی، پولیس کی جوابی فائرنگ میں ایک ڈاکو زخمی ہو گیا جس کو گرفتار کر لیا گیا ہے، گرفتار ڈاکو کا نام حمزہ ہے جس کے قبضے سے ایک پستول اور موٹر سائیکل برآمد ہوا ہے۔
تھانہ وارث خان کے علاقہ میں ایک روز قبل خاتون ٹیچر سے رابری اور تشدد کے مقدمہ میں اہم پیش رفت،
واردات میں ملوث ڈاکؤوں کی رات گئے پولیس پارٹی پر فائرنگ،
ایک ڈاکو زخمی حالت میں گرفتار، زخمی ڈاکو حمزہ کے قبضہ سےپسٹل اور زیراستعمال موٹرسائیکل برآمد، pic.twitter.com/x6TQVRNGUr
— Rawalpindi Police (@RwpPolice) August 29, 2023
دوسری جانب سی پی او راولپنڈی سید خالد ہمدانی کی ہدایت پر ایس پی رورل نے ڈکیتی اور تشدد کا شکار ہونے والی خاتون ٹیچر کے شوہر ظفر سے ان کے گھر پر جا کر ملاقات کی اور انہیں پولیس کی کارروائی سے آگاہ کیا۔
خاتون ٹیچر کے شوہر ظفر نے پولیس کی کارروائی پر اطمینان کا اظہار کیا ہے اور کہا ہے کہ ان کی زوجہ کے ساتھ جو کچھ ہوا، اس پر پولیس نے یقین دہانی کرائی ہے کہ ملزمان کو جلد از جلد قانون کے کٹہرے میں لایا جائے گا، وہ پولیس کی کارکردگی سے مطمئن ہیں۔
وارث خان کے علاقہ میں خاتون سے رابری اور تشدد کا معاملہ، سی پی او سید خالد ہمدانی کی ہدایت پر ایس پی راول کی مدعی سے ملاقات، ایس پی راول نےمدعی مقدمہ متاثرہ خاتون کے شوہر کو اب تک کی تفتیش اور پولیس کارروائی سے آگاہ کیا، اب تک کی پولیس تفتیش اور کارروائی پر مدعی کا اظہار اطمینان۔ pic.twitter.com/171VrYIdW3
— Rawalpindi Police (@RwpPolice) August 28, 2023
واضح رہے کہ 28 اگست کو راولپنڈی میں تھانہ وارث خان کے علاقے محلہ حکمداد میں ڈکیتی کی واردات میں ڈاکو خاتون سے پرس اور موبائل فون چھین کر فرار ہو گئے۔ پرس میں نقدی، طلائی انگوٹھیاں اور موبائل فون موجود تھا۔
” انتہا” pic.twitter.com/T1snL7hJMd
— Abdul Jabbar (@abduljabbarisb) August 28, 2023
ڈاکوؤں نے ڈکیتی کے دوران خاتون کو زدو کوب اور ہراساں کرنے کے ساتھ ساتھ تشدد کا نشانہ بھی بنایا تھا، فرار ہونے سے قبل ڈاکوؤں نے خاتون کو گلی میں گرا دیا اور موٹر سائیکل پر اسلحہ لہراتے ہوئے فرار ہو گئے تھے۔
بعد میں یہ بات سامنے آئی تھی کہ کہ ڈکیتی کا شکار ہونے والی خاتون ایک اسکول ٹیچر ہے۔
