جنوبی افریقہ کے شہر جوہانسبرگ میں ایک کثیر المنزلہ عمارت میں آتشزدگی کے بعد کم از کم 63 افراد ہلاک اور 40 سے زائد زخمی ہوگئے ہیں۔ شہری انتظامیہ نے مزید ہلاکتوں کا خدشہ ظاہر کیا ہے۔
جوہانسبرگ ایمرجنسی مینجمنٹ سروسز کے ترجمان رابرٹ مولاؤدزی نے بتایا کہ جمعرات کی صبح لگنے والی آگ نے شہر کے مرکزی کاروباری ضلع میں واقع ایک عمارت کو اپنی لپیٹ میں لے لیا تھا۔
’اب تک جائے وقوعہ سے 63 لاشیں برآمد ہوچکی ہیں، جہاں اب بھی تلاش اور بازیابی کا عمل جاری ہے، یہی وجہ ہے کہ ہلاکتوں کی تعداد میں اضافہ کا خدشہ ہے۔‘
The death toll is over 60 people, this is the highest number for a building fire in the history of the city. https://t.co/3uv4JfPP5h
— News24 🇿🇦 (@News24) August 31, 2023
حکام کے مطابق آگ پر کافی حد تک قابو پالیا گیا لیکن شہر کے وسط میں کالی عمارت کی کھڑکیوں سے دھواں اٹھتا دیکھا جا سکتا ہے۔
کچھ کھڑکیوں سے چادروں اور دیگر سامان کی تاریں بھی لٹکی ہوئی تھیں۔ یہ واضح نہیں تھا کہ آیا لوگوں نے ان کا استعمال آگ سے بچنے کے لیے کیا تھا یا وہ اپنے مال کو بچانے کی کوشش کر رہے تھے۔
ریسکیو سروس کے مطابق مرنے والوں میں کم از کم ایک بچہ بھی شامل ہے، آگ سے جھلسنے اور زخمی ہونے والے شہریوں کو صحت کے مختلف مراکز میں ہنگامی بنیادوں پر علاج فراہم کیا جارہا ہے۔
جوہانسبرگ ایمرجنسی مینجمنٹ سروسز کے مطابق مذکورہ کثیرالمنزلہ عمارت مؤثر طور پر ایک غیر رسمی رہائشی انتظام کے طور پر استعمال کی جارہی تھی، جہاں بے گھر افراد بغیر کسی رسمی لیز کے معاہدے کے رہائش کی تلاش میں چلے گئے تھے۔
عینی شاہدین نے بتایا کہ عمارت میں لگ بھگ 200 افراد رہائش پذیر تھے، یہی وجہ ہے کہ امدادی کارکنوں کے لیے بھڑکتی ہوئی آگ کو بجھاتے ہوئے عمارت کی تلاش کا عمل خاصا مشکل بنا دیا ہے۔
جنوبی افریقہ کی نیوز 24 آن لائن نیوز سائٹ کے مطابق آگ لگنے کی وجہ ابھی تک معلوم نہیں ہو سکی ہے۔