خیبر پختونخوا کے ضلع بنوں میں سیکیورٹی چیک پوسٹ کے قریب خودکش حملےمیں 9 سیکیورٹی اہلکار شہید جبکہ 5 زخمی ہو گئے۔
بنوں پولیس کے حملے کی تصدیق کر دی اور بتایا کہ دھماکا خودکش تھا جو جانی خیل پولیس اسٹیشن کی حدود میں ہوا۔ بنوں پولیس کے ایک افسر نے بتایا دھماکا سیکیورٹی چیک پوسٹ کے قریب سیکیورٹی فورسز پر ہوا۔
مزید پڑھیں
ایک موٹر سائیکل سوار نے موٹر سائیکل سیکیورٹی فورسز کی گاڑی کے ساتھ ٹکرائی جس کے بعد زور دار دھماکا ہوا۔
آئی ایس پی آر کے مطابق ایک موٹرسائیکل پر سوار خودکش بمبار نے بنوں ضلع کے علاقے جانی خیل میں فوجی قافلے کے قریب خود کو دھماکے سے اڑا لیا جس کے نتیجے میں نائب صوبیدار صنوبر علی سمیت 9 جوانوں نے شہادت قبول کی جب کہ 5 فوجی زخمی ہوئے۔
حملے کے بعد سیکیورٹی فورسز نے علاقے کو گھیرے میں لے لیا اور علاقے میں پائے جانے والے دہشت گردوں کے خاتمے کے لیے کارروائی شروع کردی۔
ترجمان آئی ایس پی آر کا کہنا تھا کہ پاکستان کی سیکیورٹی فورسز دہشت گردی کی لعنت کو ختم کرنے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔
ایک پولیس افسر نے وی نیوز کو بتایا کہ واقعے کے بعد امدادی ٹیمیں اور پولیس بھی موقع پر پہنچ گئیں اور زخمیوں کو فوری طور پر اسپتال منتقل کر دیا۔
انہوں نے مزید بتایا کہ حملے کے بعد پورے علاقے میں سرچ آپریشن بھی شروع ہے تاہم ابھی تک کوئی گرفتاری عمل میں نہیں آئی ہے۔
دوسری جانب کالعدم تنظیم نے حملے کی ذمہ داری قبول کی ہے۔ اور مبینہ حملہ آور کی تصویر بھی جاری کر دی ہے۔
نگراں وزیراعظم کی مذمت، شہدا کے ورثا و زخمیوں سے اظہار ہمدردی
Heartbroken by the loss of 9 valiant soldiers in Bannu Division, KPK, to a cowardly terrorist act that injured many. Such acts are utterly reprehensible. My thoughts are with the families of the martyred and injured. 🇵🇰 stands resolute against such terror.
— Anwaar ul Haq Kakar (@anwaar_kakar) August 31, 2023
دریں اثنا نگراں وزیراعظم انورالحق کاکڑ نے دہشت گردی کے اس واقعے پر شدید دکھ کا اظہار کرتے ہوئے کہا ہے کہ ملک ایسی بزدلانہ کارروائیوں کے خلاف پرعزم ہے۔
اپنے ٹوئٹر پیغام میں میں بزدلانہ دہشت گردی کی کارروائی میں 9 بہادر سپاہیوں کی شہادت سے دل ٹوٹ گیا جس میں بہت سے لوگ زخمی بھی ہوئے۔ ان کا مزید کہنا تھا کہ ایسی حرکتیں سراسر قابل مذمت ہیں اور ان کی ہمدردیاں شہید اور زخمیوں کے اہل خانہ کے ساتھ ہیں۔
