وزیر اعظم کے معاون خصوصی برائے حکومتی مستعدی ڈاکٹر جہانزیب خان نے پاکستان میں موجود سفارتی مشنز سے کہا ہے کہ وہ پاکستان کے وسائل سے فائدہ اٹھانے کے لئے اپنے ممالک کی حوصلہ افزائی کریں۔
وزارت خارجہ میں سفارتی مشنز کے لیے اسپیشل انویسٹمنٹ فیسیلیٹیشن کونسل (ایس آئی ایف سی ) پر منعقد کیے گئے بریفنگ سیشن سے خطاب کرتے ہوئے انہوں نے کہا کہ حکومت نے حال ہی میں یہ کونسل تشکیل دی ہے جو فیصلہ سازی کو تیز کرنے اور ملک میں براہ راست غیر ملکی سرمایہ کاری کو فروغ دینے کے علاوہ ’ون ونڈو‘ پلیٹ فارم کے طور پر کام کرے گی۔
معاون خصوصی نے اپنی پریزینٹیشن کے دوران پاکستان میں آئی ٹی، زراعت، توانائی اور کان کنی کے شعبوں میں سرمایہ کاری کے مواقع کو خاص طور پر اجاگر کیا۔
اس بریفنگ سیشن کا اہتمام سیکرٹری خارجہ سائرس سجاد قاضی نے کیا جس میں وزارت خارجہ کے اعلیٰ حکام بھی شریک ہوئے۔