کراچی میں داماد اور بیوی کو قتل کرکے تیزابی نالے میں پھینکنے والے سفاک قاتل کو 04 ساتھیوں سمیت گرفتار کرلیا گیا۔
ترجمان ایس ایس پی انوسٹی گیشن ڈسٹرکٹ کیماڑی کراچی کے مطابق تفتیشی ٹیم تھانہ شیرشاہ نے عمدہ کارکردگی کا مظاہرہ کرتے ہوئے دوہرے قتل میں ملوث 05 ملزمان کو گرفتار کرلیا ہے۔
سال 2021 میں ملزم نواز ولد سروپو نے اپنے بھائی مجید، بیٹے کاشف، بھتیجوں اکرام عرف اکرم اور الٰہی بخش عرف صدورا کے ساتھ مل کر اپنے ہونے والے داماد قربان کو اغوا کرکے تشدد کے بعد قتل کرکے کیمیکل زدہ نالے میں پھینک دیا تھا جبکہ اس قتل کے 3 یوم بعد ہی اپنی بیوی اللہ بچائی کو بھی قتل کر کے نعش کو تھانہ سائٹ سپر ہائی وے کی حدود میں واقع قبرستان میں پھینک دیا تھا۔
واقعہ کا مقدمہ الزام نمبر 137/2021 بجرم دفعہ 365/302/34 ت پ تھانہ شیر شاہ میں درج کیا گیا تھا۔
واردات کے بعد ملزمان روپوش ہوگئے تھے جن کی گرفتاری کے لیے SIO تھانہ شیرشاہ سب انسپکٹر ارشد تنولی کی سربراہی میں 03 ٹیمیں تشکیل دی گئیں۔ انچارج ٹیکنیکل برانچ شکیل احمد کی تیکنیکی معاونت سے کئی روز کی ریکی کے بعد پانچوں ملزمان کو بیک وقت مختلف علاقوں سے گرفتار کیا گیا۔ گرفتار ملزمان سے مزید تفتیش جاری ہے۔
