کینسر اسپیشلسٹ نے طبی معائنے کے بعد سابق وزیراعظم اور پاکستان مسلم لیگ (ن) کے صدر اور میاں محمد شہباز شریف کے کینسر ٹیسٹ کی رپورٹ کلیئر قرار دے دی۔
میڈیا رپورٹس کے مطابق سابق وزیر اعظم شہباز شریف نے 2 ہفتے قبل لندن میں کینسر کے ٹیسٹ کروائے تھے جن کی رپورٹس کا معروف کینسر اسپیشلسٹ ڈاکٹر مارٹن کیپلن نے معائنہ کیا اور شہباز شریف کو بتایا کہ وہ رپورٹس کلیئر ہیں اور چوں کہ مرض لوٹ کر نہیں آیا اس لیے اب خطرے یا پریشانی کی کوئی بات نہیں۔
شہباز شریف کی ریڑھ کی ہڈی کا اسکین آئندہ ہفتے ہارلے سٹریٹ کی کلینک میں ہوگا، شہباز شریف کینسر کے علاوہ اپنے دیگر ٹیسٹ کروانے کے بعد تقریباً 10 روز بعد وطن واپسی کا سفر کریں گے۔
یاد رہے کہ شہباز شریف کو سنہ 2000 میں خطرناک کینسر کی تشخیص ہوئی تھی جس کے بعد سے انہیں ہر سال کینسر کا ٹیسٹ کروانا پڑتا ہے۔ وہ اس سلسلے میں سنہ 2003 میں نیو یارک کے سلوئن کیٹرنگ اسپتال میں کئی ماہ زیرعلاج بھی رہے تھے۔
دریں اثنا سابق وزیراعظم لندن میں پارٹی قائد میاں محمد نواز شریف سے متعدد ملاقاتیں کر چکے ہیں جن میں انتخابات سمیت دیگر امور پر غور کیا گیا۔ ان ملاقاتوں کے بعد شہباز شریف نے یہ بھی بتایا تھا کہ نواز شریف اکتوبر میں پاکستان واپس آئیں گے۔
