امریکی ریاست آرکنساس کی ایک 7 سالہ بچی کو اس وقت قدرت کی جانب سے ایک شاندار تحفہ ملا جب وہ اپنی سالگرہ کے موقع پر کریٹر آف ڈائمنڈ اسٹیٹ پارک میں والدین کے ساتھ چہل قدمی کر رہی تھی کہ اسے 2.95 قیراط کا ہیرا ملا، جو شاید اس کے لیے قدرت کی جانب سے سالگرہ کا تحفہ تھا۔
ریاست آرکنساس پاک کے حکام کا کہنا ہے کہ پارگولڈ سے تعلق رکھنے والی اسپین براؤن اپنی سالگرہ منانے کے لیے اپنے اہل خانہ کے ساتھ کریٹر آف ڈائمنڈ اسٹیٹ پارک میں چہل قدمی کر رہی تھی کہ اس کی نظر پارک کے شمالی سرچ ایریا میں چمکتے ہوئے ہیرے پر پڑی۔
حکام کا کہنا ہے کہ 7 سالہ بچی کو ملنے والے 2.95 قیراط کے اس ہیرے کا سائز ایک سبز مٹر کے دانے کے برابر ہے اور یہ سنہرے بھورے رنگ کا ہے۔
حکام کا کہنا ہے کہ یہ اس سال پارک میں آنے والے کسی بھی شخص کو ملنے والا دوسرا سب سے بڑا ہیرا ہے۔ اس سے قبل 3.29 قیراط کا اسی رنگ میں ہیرا رواں سال مارچ میں ایک شخص کو ملا تھا۔
واضح رہے کہ 1972 سے قبل ریاستی پارک بننے سے قبل یہ جگہ مرفریزبورو پارک کے نام سے ہیروں کی تجارت کرنے والے افراد کے لیے ایک کان کا درجہ رکھتی تھی۔
