ایک برطانوی شخص نے اپنے جسم پر اپنی بیٹی کے نام کے 667 ٹیٹو بنوا کر گنیز ورلڈ ریکارڈ قائم کیا ہے۔
49 سالہ مارک اوون ایونز اس سے پہلے 2017ء میں بھی ایسا ہی ریکارڈ قائم کر چکے ہیں۔ اس وقت انہوں نے اپنی کمر پر اپنی بیٹی ’لوسی‘ کے نام کے 276 ٹیٹو بنوائے تھے۔
ایونز کا ریکارڈ 2020ء میں ایک امریکی خاتون ڈائڈرا ویجل نے توڑا تھا جنہوں نے اپنے جسم پر اپنے ہی نام کے 300 ٹیٹو بنوائے تھے۔
حال ہی میں، ایونز نے ریکارڈ دوبارہ اپنے نام کرنے کے لیے اپنی دونوں ٹانگوں پر بیٹی کے نام کے 400 ٹیٹو مزید بنوائے ہیں۔
ایونز کا کہنا ہے کہ انہوں نے یہ ریکارڈ اپنی بیٹی کا یوم پیدائش منانے اور اس اسپتال کے لیے چندہ جمع کرنے کے لیے بنایا ہے جس نے اس کی بیٹی کی زندگی کے شروع کے مہینوں میں اس کا خیال رکھا تھا۔
