سندھ رینجرز اور پولیس نے مشترکہ کارروائی کر کے لیاری گینگ وار بلوچستان لبریشن آرمی (بی ایل اے) کے عرفان عرف جبل گروپ کے کارندے محمد عابد کو گرفتار کر لیا، ملزم کے قبضے سے اسلحہ اور گولہ بارود بھی برآمد کیا گیا ہے۔
پولیس کے مطابق ملزم اغوا برائے تاوان، بھتہ خوری، ٹارگٹ کلنگ اور پولیس مقابلوں میں ملوث ہے ۔
ابتدائی تفتیش کے دوران ملزم نے اپنے دیگر ساتھیوں نصیر عرف بندھیچا، رضوان عرف بادشاہ، محمود اور حسین کے ساتھ مل کرچنیسر گوٹھ میں بلڈرز، منشیات کے اڈوں اور گٹکا ماوا فروخت کرنے والوں سے بھتہ وصول کر کے لیاری گینگ وار کے کمانڈر عرفان عرف جبل اور فاروق روٹھا کودینے کا اعتراف کیا ہے۔
گرفتار ملزم کی نشاندہی پر ملزم کے دیگر ساتھیوں کی گرفتاری کے لیے چھاپے مارے جا رہے ہیں۔
گرفتارملزم کو مع مسروقہ سامان مزید قانونی کارروائی کے لیے پولیس کے حوالے کر دیا گیا ہے، پولیس نے دیگر ملزمان کی گرفتاری کے لیے عوام سے بھی پولیس سے تعاون کی درخواست کی ہے۔
واضح رہے کہ گزشتہ روز نگراں وزیر اعلیٰ سندھ جسٹس (ر) مقبول باقر نے سندھ پولیس کو رینجرز کے ساتھ مل کر اسٹریٹ کرائمز اور کچے میں ڈاکوؤں کے خلاف فیصلہ کن آپریشن کا حکم دیا ہے۔
