’ڈنکی‘ کب ریلیز ہو گی شاہ رخ خان نے بتا دیا؟

فلم ڈنکی کے ہدایتکار راج کمار ہیرانی ہیں جبکہ شاہ رخ خان اور تاپسی پنو نے مرکزی کردار ادا کیے ہیں۔ شاہ رخ خان نے کہا ہے کہ فلم رواں برس کرسمس یا نئے سال کے آغاز پر ریلیز کی جائے گی۔

شاہ رخ خان نے اپنی نئی فلم ’جوان‘ کی کامیابی کی تقریب کے دوران اپنی آنے والی فلم ڈنکی کی ریلیز کی تاریخ کی تصدیق کی۔ بھارتی خبر رساں ایجنسی اے این آئی کے مطابق ڈنکی آنے والے کرسمس یا نئے سال کے آس پاس سینما گھروں کی زینت بنے گی۔ ’جوان‘ اور ’پٹھان‘ کی کامیابی کے بعد یہ قیاس آرائیاں کی جا رہی تھیں کہ راج کمار ہیرانی کی ہدایت کاری میں بننے والی شاہ رخ خان کی اگلی فلم ملتوی ہوسکتی ہے۔

اے این آئی کی جانب سے ایکس (ٹوئیٹر) پر شیئر کی گئی ایک ویڈیو میں شاہ رخ خان نے کہا کہ ’خدا مہربان ہے جبکہ خدا ’جوان‘ کے ساتھ اس سے بھی زیادہ مہربان رہا ہے اور میں ہمیشہ یہی کہتا ہوں‘۔ ہم نے 26 جنوری کو یوم جمہوریہ (پٹھان کے ساتھ) شروع کیا، یہ ایک اچھا اور مبارک دن ہے۔

ان کا کہنا تھا کہ اب نیا سال اور کرسمس قریب ہے، ہم ڈنکی کو ریلیز کریں گے۔ میں قومی یکجہتی کو برقرار رکھتا ہوں۔ ویسے بھی جب میری فلم ریلیز ہوتی ہے تو عید ہوتی ہے۔ میں سخت محنت کر رہا ہوں، میں پچھلے 29 سالوں سے زیادہ محنت کر رہا ہوں. میں سخت محنت کرتا رہوں گا کیونکہ اب مجھے سب سے زیادہ خوشی اس وقت ہوتی ہے جب لوگ فلم دیکھنے کے بعد خوش ہوتے ہیں۔

راج کمار ہیرانی کی فلم ’ڈنکی‘ شاہ رخ خان، راج کمار اور تاپسی کی پہلی فلم ہے۔ اے این آئی کے مطابق فلم میں وکی کوشل اور دھرمیندر نے بھی اہم کردار ادا کیے ہیں۔ شاہ رخ خان کی فلم ’جوان‘ کو مداحوں کی جانب سے بلاک بسٹر قرار دیا جا چکا ہے۔

فلم ’جوان‘ پہلے ہی دن باکس آفس پر 4 سو 11کروڑ روپے کما چکی ہے۔ فلم 7 ستمبر کو سینما گھروں کی زینت بنی تھی۔ فلم میں شاہ رخ خان کے علاوہ نینتھارا، وجے سیتوپتی، پریامنی، سانیا ملہوترا، ردھی ڈوگرہ اور سنجیتا بھٹاچاریہ بھی شامل ہیں۔

ایٹلی کی ہدایتکاری میں بننے والی فلم میں دپیکا پڈوکون اور سنجے دت بھی خصوصی کردار میں نظر آئیں گے۔ ’جوان‘ عالمی باکس آفس پر 500 کروڑ کا ہندسہ عبور کرنے والی تیز ترین ہندی فلم بن چکی ہے۔ اس سنگ میل تک پہنچنے میں فلم کو صرف 4 دن لگے۔